మత్స్య శాఖ ఉద్యోగులను క్రమబద్ధీకరించాలి!

తెలంగాణ రాష్ట్రం విస్తారమైన లోతట్టు నీటి వనరులతో, విభిన్న జలనీటి వనరులతో సమృద్ధిగా ఉంది. ఫలితంగా చేపలు మత్స్య ఉత్పత్తి పరిధి ప్రతి సంవత్సరం పెరుగుతోంది. మత్స్య పరిశ్రమ అభివృద్ధితో వేల కోట్ల ఆదాయాన్ని రాష్ట్రం ఆర్జిస్తోంది, మత్స్య రైతుల జీవనోపాధి, ఆదాయ స్థాయిలను మెరుగుపరుస్తోంది. సరసమైన ధర, పరిశుభ్రమైన స్థితిలో మార్కెటింగ్ పరిస్థితులు, మౌలిక సదుపాయాలను మెరుగుపరచడం, 37 లక్షల మంది మత్స్యకారుల సమాజానికి జీవనోపాధిని అందించడానికి సంక్షేమ, అభివృద్ధి కార్యక్రమాలను అమలు చేయడం మత్స్య శాఖ విధి.

కాంట్రాక్టు ఉద్యోగులుగా నియమించినప్పటికీ..

తెలంగాణలో 177 మంది కాంట్రాక్టు ఉద్యోగులు, పిషరిష్ ఫీల్డ్ ఆఫీసర్లు (29), ఫిషరీస్ అసిస్టెంట్లు (73), మత్స్యకారులు (75) మంది, మత్స్య రంగాన్ని అభివృద్ధి చేయడంతోపాటు మత్స్య పారిశ్రామిక సహకార సంఘాలు, గిరిజన మత్స్య పారిశ్రామిక సహకార సంఘాల వారికి ఆదాయం, ఉపాధి అవకాశాలను అందించడానికి కృషి చేస్తున్నారు. 2017 నుండి డిపార్ట్‌మెంటులో పనిచేస్తున్న కాంట్రాక్టు ఉద్యోగులను మత్స్యశాఖ అభివృద్ధి శాఖలో రెగ్యులరైజ్ చేయాలి.

కాంట్రాక్టు ఉద్యోగులు, సాంకేతికంగా మంచి అర్హతలు ఉన్న పోస్ట్ గ్రాడ్యుయేట్లు, గ్రాడ్యుయేట్లు, డిప్లొమా హోల్డర్స్ మత్స్యకారులకు సాంకేతిక, వృత్తిపరమైన, ఇతర సంబంధిత సేవలను అందించడంలో ప్రభుత్వ కార్యక్రమాలను అత్యంత సంతృప్తికరంగా అమలు చేయడంలో వారు విధులను నిర్వహిస్తున్నారు. కాంట్రాక్టు ఉద్యోగులుగా నియమించబడినప్పటికీ, మంచి అర్హత, సాంకేతిక నైపుణ్యం, నిర్వాహక నైపుణ్యాలను కలిగి ఉన్నారు. విధులు, విధులతో పాటు సాంకేతికంగా అర్హత కలిగి కష్టపడి పనిచేసే స్వభావం కలిగిన వీరు మత్స్యకార సంఘం సంక్షేమం కోసం ప్రశంసనీయమైన కృషి చేశారు.

ఆదాయం స‌ృష్టించేందుకు..

తెలంగాణ రాష్ట్రంలో మత్స్య రంగం అభివృద్ధికి ప్రభుత్వం నిధులను గరిష్ట స్థాయిలో వినియోగించింది. 2016-17 నుండి 2022-23 వరకు కాంట్రాక్టు ఉద్యోగుల క్రియాశీల ప్రమేయంతో ఈ కాలంలో పలు అభివృద్ధి, సంక్షేమ కార్యకలాపాలు కొనసాగాయి. అన్నింటికంటే మించి, తెలంగాణ రాష్ట్రంలో ఆక్వా కల్చర్ ఉత్పత్తుల ఉత్పత్తి, ఉత్పాదకతను మెరుగుపరచడానికి నిర్వాహక నైపుణ్యాలను మెరుగుపరచడానికి, సాంకేతిక మద్దతు, వైద్య సలహాలను అందజేసేందుకు మత్స్యకారుల సంఘం, మత్స్యకారులందరికీ అవగాహన, శిక్షణా కార్యక్రమాలను నిర్వహిస్తున్నారు.

రాష్ట్రంలో మత్స్యశాఖకు నాయకత్వం వహించడానికి, బలహీన వర్గాలకు మరింత ఆదాయం మరియు ఉపాధి అవకాశాలను సృష్టించేందుకు మత్స్య ఉత్పత్తి వేగంగా అభివృద్ధి చెందడానికి విస్తృత అవకాశాలు ఉన్నాయి. కాబట్టే 2017 నుండి డిపార్టుమెంట్లో పనిచేస్తున్న కాంట్రాక్టు ఉద్యోగులను క్రమబద్దీకరించాలని రాష్ట్ర ముఖ్యమంత్రివర్యులు రేవంత్ రెడ్డిని కోరుతున్నాం.

రావుల రాజేశం

తెలంగాణ సామాజిక రచయిత సంఘం

77801 85674