‘ఇండియన్ 2’ పక్కన పెట్టిన శంకర్?

దిశ, వెబ్‌డెస్క్:
ప్రముఖ డైరెక్టర్ శంకర్ సినిమాలంటే ఇష్టపడని సినీ అభిమానులు ఉండరంటే అతిశయోక్తి కాదు. హీరోలపై అభిమానంతోనే కాకుండా దర్శకుడి ఇమేజ్‌తోనూ ప్రేక్షకులను థియేటర్లకు రప్పించిన ఘనత ఆయనకే సొంతం. దర్శకుడిగా తన మొదటి చిత్రం ‘జెంటిల్‌మెన్’ నుంచి ప్రేక్షకులను తన స్కిల్స్‌తో మెస్మరైజ్ చేస్తు్న్న శంకర్.. ప్రస్తుతం కమల్‌హాసన్ హీరోగా ‘భారతీయుడు 2’ తెరకెక్కిస్తున్నారు. అయితే ఈ మూవీ షూటింగ్‌ ప్రారంభమైనప్పటి నుంచి ఆటంకాలే ఎదురవుతున్నాయి. ఒకదాని వెంట మరొకటిగా సమస్యలు వెంటాడుతూనే ఉన్నాయి.

షూటింగ్ సమయంలో జరిగిన ప్రమాదంలో ముగ్గురు చనిపోగా, పలువురు గాయపడ్డారు. ఆ తర్వాత నిర్మాణ సంస్థ లైకా ప్రొడక్షన్స్‌, శంకర్ మధ్య విభేదాలు తలెత్తినట్లు వార్తలు వెలువడటంతో పాటు కరోనా పరిస్థితుల నడుమ ఈ ప్రాజెక్ట్ అగమ్యగోచరంగా తయారైంది. ఈ మూవీ షూటింగ్ పున:ప్రారంభం గురించి నిర్మాణ సంస్థ పట్టించుకోవడం మానేసిందని టాక్. దీంతో శంకర్ వేరే ప్రాజెక్టు ప్రారంభించాలనే ఆలోచనలో ఉన్నట్లు కోలీవుడ్ వర్గాలు కోడై కూస్తున్నాయి. అయితే ప్రస్తుతానికి తన కూతురు అదితి పెళ్లి పనుల్లో బిజీ అయిపోయిన శంకర్.. సినిమా పనులను తాత్కాలికంగా పక్కన పెట్టేశారని తెలుస్తోంది. కూతురి పెళ్లి తర్వాతే తన తర్వాతి సినిమా గురించి ఆలోచిస్తారని తెలుస్తోంది.