స్త్రీలు ఈ ఆలయంలో అలా చేస్తే సంతానం కలుగుతుందట.. అది నిజమా ..?
దిశ, ఫీచర్స్ : భారతదేశంలో అనేక దేవతల ఆలయాలు నెలకొని ఉన్నాయి. వాటిలో కొన్ని ఆలయాలు అంతుచిక్కని రహస్యాలకు ప్రసిద్ధి చెందుతాయి. అయితే చాలామంది ఆ రహస్యాలను ఛేదించాలనుకున్నా అది మాత్రం సాధ్యపడక వెనుదిరిగి పోయారు. అలాంటి ఒక ఆలయమే సిమ్సా మాత దేవాలయం. ఈ ఆలయానికి ఓ ప్రత్యేకత ఉంది. సంతానం లేని మహిళలు బిడ్డను కనేందుకు ఎన్నో ప్రయత్నాలు చేస్తుంటారు. సంతానం కలిగేందుకు ఎన్నో పూజలు, వ్రతాలు చేస్తుంటారు. అయితే పిల్లలను కనాలనే స్త్రీలు సిమ్సా మాత దేవాలయానికి వెళ్లి అక్కడ నేలపై పడుకుంటే గర్భం దాల్చుతారని పురాణాలు చెబుతున్నాయి. ఇంతకీ ఈ ఆలయం ఎక్కడ ఉంది. ఆలయంలో దాగి ఉన్న మరిన్ని రహస్యాలు ఏంటి, సంతానం కలగాలంటే దేవిని ఎలా పూజించాలో ఇప్పుడు తెలుసుకుందాం.
స్థలపురాణం..
ఈ ఆలయం హిమాచల్‌లోని మండి జిల్లాలోని సిమ్సా గ్రామంలో ఉంది. ఇది చాలా పురాతనమైన దేవాలయం. ఇక ఈ ఆలయానికి వచ్చి ఏ కోరిక కోరినా తప్పకుండా నెరవేరుతుందని ఇక్కడి భక్తుల నమ్మకం. ముఖ్యంగా పిల్లలు లేని మహిళలు ఇక్కడి అద్భుతాలను నమ్ముతారు. అమ్మవారు స్వయంగా కలలో దర్శనమిచ్చి వారికి సంతానం కలిగేలా ఆశీర్వదిస్తారని, స్త్రీలు సంతానం పొంది ఆనందాన్ని పొందుతారని చెబుతారు. సుదూర ప్రాంతాల నుంచి వేలాది మంది సంతానం లేని మహిళలు ఇక్కడి ప్రత్యేక అంతస్తులో నిద్రించడానికి ఈ ఆలయానికి వస్తారు.
నవరాత్రులలో రద్దీ..
ఈ ఆలయంలో సంతానం లేని స్త్రీలు నేలపై పడుకుంటే సంతానం కలుగుతుందని నమ్మకం. ఈ ఆలయంలో నవరాత్రులకు సంతానం కలగడానికి ప్రత్యేక ప్రాముఖ్యత ఉంది. నవరాత్రి సమయంలో హిమాచల్, పంజాబ్, హర్యానా, చండీగఢ్ వంటి పొరుగు రాష్ట్రాలతో పాటు దేశం నలుమూలల నుండి వందలాది మంది వివాహిత జంటలు ఈ ఆలయానికి వస్తారు. ఈ ప్రదేశం సిమ్సా మాత దేవాలయం పేరుతో ప్రసిద్ధి చెందింది. మాతా సిమ్సా లేదా దేవి సిమ్సాను సంతన్ దాత్రి మాత అని కూడా అంటారు.
