డ్రగ్స్ విక్రయిస్తూ అడ్డంగా దొరికిన నటి.. పరారీలో ఆమె ఫ్రెండ్

దిశ, వెబ్‌డెస్క్: డ్రగ్స్ వినియోగం చలన చిత్ర పరిశ్రమలో వరుస ప్రకంపనలు సృష్టిస్తున్న విషయం తెలిసిందే. తాజాగా మరోమారు డ్రగ్స్ వివాదంలో సినీ నటి అడ్డంగా దొరికడం కలకలం రేపింది. ఇండస్ట్రీలో అవకాశాలు లేక అడ్డదారిలో నటి డబ్బు సంపాదిస్తున్నట్లు తెలిసింది. కేరళ రాష్ట్రం కొచ్చిలోని త్రిక్కక్కరాలోని ఉనిచిర థోపిల్ జంక్షన్ లో ఓ అపార్ట్ మెంట్ మూడో అంతస్తులో మలయాళి నటి అంజుకృష్ణ అద్దెకు ఉంటున్నారు. బెంగళూరు నుంచి పెద్ద మొత్తం డ్రగ్స్ తీసుకొచ్చి తన అపార్ట్ మెంట్‌లో నిల్వ ఉంచి విక్రయిస్తున్నట్లు పోలీసులకు ఇన్ఫర్మేషన్ వచ్చింది.

దీంతో అంజుకృష్ణ ఇంటిపై దాడి చేసిన పోలీసులు 56 గ్రాముల సింథటిక్ డ్రగ్స్ ఎండీఎంఏను గుర్తించారు. నటితో కలిసి అదే అపార్ట్ మెంట్ లో ఉంటున్న కాసర్ గోడ్ కు చెందిన షమీర్ పోలీసులను చూసి పరారయ్యాడు. ఈ ఘటనలో నటి అంజుకృష్ణను పోలీసులు అరెస్ట్ చేశారు. పరారీలో ఉన్న షమీర్ కోసం పోలీసులు గాలింపు చర్యలు ముమ్మరం చేశారు. కాగా వీరిద్దరు దంపతులమని చెప్పి నెల రోజుల నుంచి అపార్ట్ మెంట్ లో ఉంటున్నట్లు తెలిసింది. అవకాశాలు లేకపోవడంతో బెంగళూరు నుంచి డ్రగ్స్ తెచ్చి కొచ్చిలో విక్రయిస్తున్నట్లు పోలీసులు గుర్తించారు.