ఇద్దరు బైక్ దొంగల అరెస్ట్
దిశ, నిర్మల్ కల్చరల్ : ద్విచక్ర వాహనాలను చోరీ చేస్తున్న ఇద్దరు వ్యక్తులను నిర్మల్ పట్టణ పోలీసులు అరెస్ట్ చేశారు. పట్టణ సీఐ శ్రీనివాస్ తెలిపిన వివరాల ప్రకారం జిల్లా కేంద్రంలోని బుధవార్ పేట్, చైన్ గేట్ ప్రాంతాల్లో ద్విచక్ర వాహనాలు వరుసగా చోరీకి గురవుతున్నాయన్న ఫిర్యాదు మేరకు పోలీసులు కేసు నమోదు చేసుకుని దర్యాప్తు ప్రారంభించారు. శుక్రవారం రాత్రి ఎస్సై రమణరావు ప్రధాన కూడళ్లలో వాహనాల తనిఖీలు నిర్వహించారు.
నిజామాబాద్ జిల్లా ముప్కాల్ గ్రామానికి చెందిన చాకటి శివ, జిల్లా కేంద్రంలోని బంగల్ పేట్ కు చెందిన చిన్నయ్య అనే ఇద్దరూ ద్విచక్రవాహనంతో అనుమానస్పదంగా కనిపించారు. వాహనానికి సంబంధించిన ఎలాంటి ధృవపత్రాలు లేకపోవడంతో పోలీసులు విచారణ చేయగా, వాహనాలు చోరీచేసి విక్రయిస్తున్నట్లు అంగీకరించారు. దీంతో వాహనాలను స్వాధీనం చేసుకుని వారిని రిమాండ్ కు తరలించినట్లు పోలీసులు పేర్కొన్నారు. కేసును ఛేదించిన ఎస్సై, కానిస్టేబుల్లు సురేష్ గౌడ్, కూన సందీప్ ను సీఐ అభినందించారు.
