కేపీహెచ్​బీ కాలనీలో చైన్​ స్నాచింగ్​

దిశ, కూకట్​పల్లి : రోడ్డుపై నడుచుకుంటూ వెళ్తున్న మహిళ మెడలో నుంచి గుర్తు తెలియని వ్యక్తి బంగారు గొలుసు లాక్కొని పరారైన సంఘటన కేపీహెచ్​బీ పోలీస్​ స్టేషన్​ పరిధిలో చోటు చేసుకుంది. పోలీసులు తెలిపిన వివరాల ప్రకారం కేపీహెచ్​బీ కాలనీ 9వ ఫేజ్ పీవీ నరసింహరావు పార్కు సమీపంలో నివాసం ఉంటున్న మేక రాంబాబు భార్య మేక మణి (54) బుధవారం రాత్రి ఇంటి నుంచి నడుచుకుంటూ విజేత సూపర్​ మార్కెట్​ సమీపంలో అరటి పండ్లు కొనగోలు చేసేందుకు వెళ్తుండగా సాయి బృందావన్​ అపార్ట్​మెంట్​ సమీపంలో వెనక నుంచి నడుచుకుంటూ వచ్చిన ఓ గుర్తు తెలియని వ్యక్తి మణి మెడలో నుంచి 4 తులాల బంగారు గొలుసును లాక్కొని పరారయ్యాడు.

దొంగ అని అరవడంతో చుట్టు పక్కల వారు వచ్చే లోగా నిందితుడు అక్కడి నుంచి పరారయ్యాడు. సంఘటన అనంతరం బాధితురాలు కేపీహెచ్​బీ పోలీసులకు ఫిర్యాదు చేసింది. బంగారు గొలుసు లాక్కుని పరారైన వ్యక్తి సుమారు 20 నుంచి 24 సంవత్సరాల మధ్య వయస్సు వాడై ఉంటాడని, తెలుపు రంగు షర్టు, నలుపు రంగు ప్యాంట్​ ధరించి ఉన్నట్టు ఫిర్యాదులో పేర్కొన్నారు.