చికిత్స పొందుతూ వ్యక్తి మృతి..
దిశ, నాగిరెడ్డిపేట్ : నాగిరెడ్డిపేట్ మండలంలోని పోచారం గ్రామానికి చెందిన సత్య బోయిని శివ కుమార్ (31) అనే వ్యక్తి రోడ్డు ప్రమాదంలో గాయపడి చికిత్స పొందుతూ ఆదివారం ఉదయం మృతి చెందినట్లు ఎస్సై ఆంజనేయులు తెలిపారు. ఎస్సై తెలిపిన వివరాల ప్రకారం పోచారం గ్రామానికి చెందిన సత్యబోయిన శివ కుమార్ అనే వ్యక్తి రోజు మాదిరిగానే ఈనెల మూడో తేదీన ఎల్లారెడ్డి పట్టణానికి కూలిపని నిమిత్తం వెళ్లి పని ముగించుకుని రాత్రి ఏడున్నర గంటల ప్రాంతంలో తిరిగి పోచారం గ్రామానికి తన ద్విచక్ర వాహనంపై వస్తున్నాడు.
నాగిరెడ్డిపేట మండలంలోని మాల్ తుమ్మెద బ్రిడ్జ్ సమీపంలో మెదక్ వైపు నుండి వస్తున్న ఓ గుర్తు తెలియని వాహనం ఢీకొని తీవ్ర గాయాలై పడిపోగా, స్థానికులు కుటుంబ సభ్యులకు సమాచారం అందించారు. శివ కుమార్ ను చికిత్స నిమిత్తం హైదరాబాదులోని ఓ ప్రైవేట్ ఆస్పత్రికి తరలించారు. అనంతరం వైద్యుల సూచనల మేరకు మెరుగైన వైద్యం కోసం గాంధీ ఆసుపత్రికి తరలించి వైద్యం చేయిస్తుండగా, ఆస్పత్రిలో చికిత్స పొందుతూ ఆదివారం ఉదయం మృతి చెందినట్లు తెలిపారు. మృతునికి భార్య సమత, కూతుర్లు ఇందు ప్రియ ( 5), వర్షిణి (2) నెలల పిల్లలు ఉన్నట్లు తెలిపారు. మృతుని భార్య సత్యబోయిని సమత ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు.
