ఎయిర్ అంబులెన్స్‌లో చెన్నైకు CSK కోచ్‌లు మైక్ హసీ, బాలాజీ
దిశ, వెబ్‌డెస్క్ : కరోనా పాజిటివ్ కేసులు నమోదు అయిన కారణంగా ఐపీఎల్ లీగ్‌ను తాత్కాలికంగా నిలిపివేసిన విషయం తెలిసిందే. టోర్నీకి ముందే పలువురు క్రికెటర్లు కరోనా బారినపడ్డారు. అయితే, ఇటీవల నిర్వహించిన కరోనా పరీక్షల్లో చెన్నై సూపర్ కింగ్స్ బ్యాటింగ్ కోచ్ మైఖేల్ హసీ, బౌలింగ్ కోచ్ లక్ష్మీపతి బాలాజీలకు కరోనా పాజిటివ్ వచ్చింది. వీరికి కరోనా పరీక్షలు నిర్వహించిన సమయంలో సూపర్ కింగ్స్ జట్టు ఢిల్లీలో ఉంది.
ఢిల్లీలో ప్రస్తుత పరిస్థితులను పరిగణనలోకి తీసుకున్న సూపర్ కింగ్స్ యాజమాన్యం హసీ, బాలాజీలను ఎయిర్ అంబులెన్స్ ద్వారా ఢిల్లీ నుంచి చెన్నై తరలించింది. చెన్నైలో వారికి మెరుగైన వైద్య సేవలు అందించేందుకు అక్కడికి తరలించినట్టు ఫ్రాంచైజీలోని ఓ అధికారి తెలిపారు. ప్రస్తుతానికి హసీ, బాలాజీకి ఎలాంటి కొవిడ్ లక్షణాలు లేవని, వారిద్దరూ బాగానే ఉన్నారని వివరించారు. ముందు జాగ్రత్తగానే వారిని చెన్నై తరలించినట్టు తెలిపారు.
