విద్యార్థులపై ఒత్తిడి తీసుకురావొద్దు !
దిశ, ఏపీ బ్యూరో: కొవిడ్ కాలంలో వృథా అయిన కాలాన్ని కవర్ చేసేందుకు విద్యార్థులపై ఒత్తిడి తీసుకురావొద్దు. చదువనేది ఆనందంగా సాగాలి. విద్యార్థులను వికసింపజేయాలే గానీ సతమతమయ్యేట్లు చేయకూడదని సీఎం జగన్ వ్యాఖ్యానించారు. సోమవారం తాడేపల్లి క్యాంపు కార్యాలయంలో పాఠశాలల ప్రారంభం, ఉన్నత విద్యపై ఉన్నతాధికారులతో సమీక్ష సందర్భంగా మాట్లాడుతూ కేంద్రం, యూజీసీ మార్గదర్శకాలను పరిశీలించి తగు నిర్ణయాలు తీసుకోవాలన్నారు. ఈ విద్యా సంవత్సరంలో వసతి దీవెన, విద్యాదీవెన పథకాల అమలుకు ప్రణాళిక వేసుకోవాలని సూచించారు. ప్రైవేటు విశ్వ విద్యాలయాల్లో ప్రమాణాలను పరిశీలించాలని కోరారు. కన్వీనర్ కోటాలో 50శాతం సీట్లు కేటాయిస్తే పేద విద్యార్థులకు ఫీజు రీయింబర్స్మెంటు ప్రవేశాలు కల్పించడానికి వీలుపడుతుందన్నారు. పాలిటెక్నిక్, ఇంజనీరింగ్లో కొత్త కోర్సులపై దృష్టి సారించాలని సీఎం సూచించారు. తిరుపతిలోని ఐఐటీ, ఐఐఎస్‌ఈఆర్‌, విశాఖలోని ఐఐఎం, తాడేపల్లిగూడెంలో ఎన్‌ఐటీ, అనంతపురం సెంట్రల్‌ వర్శిటీకి సంబంధించి జరుగుతున్న పనుల గురించి అధికారులు సీఎంకు వివరించారు.
