అర్థరాత్రి అక్కడికి పిలిచి.. కళ్లలో కారం కొట్టి.. కత్తులతో నరికి..
దిశ, శంకర్‌పల్లి : కళ్లల్లో కారం చల్లి కత్తులతో ఓ వ్యక్తిని గుర్తు తెలియని దుండగులు నరికి అతి కిరాతకంగా హత్య చేసిన సంఘటన శంకర్‌పల్లి పోలీస్ స్టేషన్ పరిధిలో శుక్రవారం అర్ధరాత్రి చోటు చేసుకుంది. శంకర్‌పల్లి పోలీసులు తెలిపిన వివరాల ప్రకారం.. మండలంలోని మహాలింగాపురం గ్రామానికి చెందిన బోడ వెంకటయ్య (40)కు ‘ఉదయం నీతో పని ఉంది శుభ గృహ వెంచర్ వద్దకు రావాలి’ అని గుర్తుతెలియని దుండగులు ఫోన్ చేసినట్లు చెబుతున్నారు. వెంచర్ వద్దకు వెళ్లగానే దుండగులు కళ్లలో కారం కొట్టి వెంకటయ్య పై దాడి చేసి హత్య చేసినట్లుగా పోలీసులు అనుమానిస్తున్నారు.
దుండగులు అతని తలతో పాటు రెండు చేతులను కత్తులతో నరికి చంపినట్లు తెలుస్తోంది. ఘటన స్థలానికి చేరుకున్న శంకర్‌పల్లి పోలీసులు డాగ్ స్క్వాడ్, క్లూస్ టీమ్ బృందాన్ని రప్పించారు. చేవెళ్ల ఏసీపీ రవీందర్ రెడ్డి పర్యవేక్షణలో శంకర్‌పల్లి సర్కిల్ ఇన్‌స్పెక్టర్ మహేష్ గౌడ్ పోలీసు సిబ్బంది సంఘటన స్థలానికి చేరుకున్నారు. ఈ హత్యకు గల కారణాలను పోలీసులు ఆరా తీస్తున్నారు. మృతుడు వెంకటయ్యకు ఫోన్ చేసింది ఎవరు..? అతన్ని హత్య చేయడానికి గల కారణాలు ఏంటి..? అనే కోణంలో దర్యాప్తు సాగిస్తున్నారు.
