'పవన్ కల్యాణ్ రాజకీయాలకు పనికిరారు.. మెగాస్టార్ లేకపోతే పవర్ స్టార్ ఎక్కడ'

దిశ, ఏపీ బ్యూరో: జనసేన అధినేత పవన్ కల్యాణ్ రాజకీయాలకు పనికిరారని వైసీపీ మాజీ మంత్రి వెల్లంపల్లి శ్రీనివాస్ అన్నారు. శనివారం ఆయన మీడియాతో మాట్లాడారు. చిరంజీవి లేకుంటే పవన్ కల్యాణ్ ఎవరికి తెలిసే వాడన్నారు. మెగాస్టార్ లేకపోతే పవర్ స్టార్ ఎక్కడి నుంచి వచ్చేవాడని అపహాస్యం చేశారు. చిరంజీవి అభిమానులు మొత్తం జనసేనకి సపోర్ట్ చేయాలని నాగబాబు అనడం సరికాదన్నారు. ఇది చిరంజీవిని అవమానించటమే అవుతుందని పేర్కొన్నారు. నాగబాబుకు ఒక విధి, విధానం లేవని మండిపడ్డారు. చిరంజీవి అభిమానులను నాగబాబు బ్లాక్ మెయిల్ చేస్తున్నారని ఆగ్రహం వ్యక్తం చేశారు. మోడీ, అమిత్ షాలకు పవన్ వెధవ వేషాలు తెలుసు అని పేర్కొన్నారు. చంద్రబాబు నుంచి ప్యాకేజీ తీసుకుంటూ బీజేపీతో పవన్ టచ్‌‌లో ఉన్నారని ఆరోపించారు. పవన్ కల్యాణ్ మాటలోడే తప్ప చేతలోడు కాదని ఎద్దేవా చేశారు. బీజేపీతో పొత్తులో ఉన్న పవన్ కల్యాణ్ రాష్ట్ర సంక్షేమం కోసం ఒక్కరోజైనా పని చేశారా? అని ప్రశ్నించారు.