నల్లమల అడవుల్లో దారితప్పిన 15 మంది భక్తులు.. కాపాడిన ఫారెస్ట్ అధికారులు

దిశ, బాపట్ల: ప్రకాశం జిల్లా నల్లమల అడవుల్లో దోర్నాల నుంచి శ్రీశైలం దేవస్థానం మార్గమధ్యంలో ఇష్టకామేశ్వరి అమ్మవారి దేవస్థానానికి వెళ్లిన 15 మంది భక్తులు బుధవారం సాయంత్రం దారి తప్పి అడవిలోకి వెళ్లి చిక్కుకుపోయారు. భయాందోళనకు గురైన భక్తులు సుమారు 6 గంటల సమయంలో డయల్ 100కి సమాచారం ఇచ్చారు. విషయం తెలుసుకున్న పోలీసులు స్థానిక ఫారెస్ట్ అధికారులను అప్రమత్తం చేయడంతో, గాలింపు చర్యలు చేపట్టిన ఫారెస్ట్ అధికారులు సాంకేతిక పరిజ్ఞానంతో రాత్రి 7:00 సమయంలో భక్తులు అడవిలో ఉన్న ప్రాంతాన్ని గుర్తించి, సురక్షిత ప్రాంతానికి తరలించారు. ప్రస్తుతం వారు ఫారెస్ట్ అధికారుల సంరక్షణలో ఉన్నారు. దారితప్పిన 15 మంది భక్తులు బాపట్ల జిల్లా రేపల్లె మండలం మంత్రిపాలెం గ్రామానికి చెందినవారని ఫారెస్ట్ అధికారులు తెలిపారు.