దారుణం.. గంజాయి బ్యాచ్ దాడిలో లోకోపైలట్ మృతి
దిశ, వెబ్ డెస్క్: విజయవాడలో దారుణ సంఘటన చోటు చేసుకుంది. గంజాయి మత్తులో ఉన్న ఓ బ్యాచ్ లోకో పైలట్ పై దాడి చేయగా తీవ్ర గాయాలతో అక్కడిక్కడే మృతి చెందాడు. ఈ ఘోరమైన సంఘటన విజయవాడ రైల్వే స్టేషన్ లో గురువారం చోటు చేసుకుంది. ఈ ఘటనకు సంబంధించిన వివరాలు ఇలా ఉన్నాయి. దక్షిణ మధ్య రైల్వే విజయవాడ డివిజన్‌లో లోకో పైలట్ అయిన డి. ఎబినేజర్ డ్యూటీ టైమ్ కావడంతో గురువారం తెల్లవారుజామున రెండు గంటల సమయంలో స్టేషన్ కు వస్తున్నాడు. ఈ క్రమంలో విజయవాడ స్టేషన్‌లోని నైజాం గేట్ సమీపంలో రైల్వే రోడ్ నెంబర్ 11లో లోకో పైలట్ వెనుక నుంచి అకస్మాత్తుగా వచ్చిన ఓ ఆగంతకుడు ఇనుప కడ్డీతో బలంగా తలపై కొట్టాడు. దీంతో లోకోపైలట్ కిందపడిపోవడంతో అతనిపై విచక్షణా రహితంగా దాడి చేశారు. తెల్లవారుజామున కావడంతో ఎవరు గమనించలేదు. దీంతో తీవ్రగాయాలైన లోకో పైలట్ అక్కడిక్కడే మృతి చెందాడు. ఈ సమాచారం అందుకున్న పోలీసులు సంఘటన స్థలానికి చేరుకొని ఆదారాలను సేకరించి..కేసు నమోదు చేసుకొని దర్యాప్తు ప్రారంభించారు. కాగా గతంలో చాలాసార్లు దాడి చేశారని.. రైల్వే అధికారులకు ఫిర్యాదు చేసిన పట్టించుకోవడం లేదని రైల్వే సిబ్బంది ఆగ్రహం వ్యక్తం చేస్తున్నారు.
