విశాఖలో హైటెన్షన్: పవన్ కల్యాణ్ పర్యటనపై ఉత్కంఠ

దిశ, డైనమిక్ బ్యూరో : జనసేన అధినేత పవన్‌ కల్యాణ్ రుషికొండ ఎర్రమట్టి దిబ్బలు క్షేత్ర స్థాయి పర్యటన పై ఉత్కంఠ నెలకొంది. పవన్ కల్యాణ్ షెడ్యూల్ ప్రకారం శుక్రవారం రుషికొండ ఎర్రమట్టి దిబ్బలు పర్యటించాల్సి ఉంది. అయితే ఇందుకు పోలీసులు అనుమతి ఇవ్వలేదు. అనుమతి లేకుండా అక్కడకు వెళ్తే తీవ్ర పరిణామాలు ఉంటాయని పోలీసులు హెచ్చరించారు. శాంతి భద్రతలకు విఘాతం కలగకుండా సహకరించాలని జనసేనకు పోలీసులు విజ్ఞప్తి చేశారు. అయితే పవన్ కల్యాణ్ పర్యటనకు పోలీసులు అనుమతి ఇవ్వకపోవడంపై జనసైనికులు ఆగ్రహం వ్యక్తం చేస్తున్నారు. పోలీసులు అనుమతి ఇచ్చినా ఇవ్వకపోయినా రిషికొండ ఎర్రమట్టి దిబ్బలను సందర్శించి తీరుతామని చెప్తున్నారు. పోలీసులు అడ్డుకుంటే సహించేది లేదని చెప్తున్నారు. దీంతో రుషికొండ ఎర్ర మట్టి దిబ్బల పవన్ కల్యాణ్ పర్యటన పై హైటెన్షన్ నెలకొంది. మరోవైపు జనసైనికులు భారీ సంఖ్యలో అక్కడకు చేరుకుంటారనే సమాచారంతో పోలీసులు సైతం అప్రమత్తమయ్యారు. నోవాటల్‌ వద్ద పోలీసులు కట్టుదిట్టమైన భద్రత ఏర్పాటు చేశారు. రుషికొండకు ఎవ్వరినీ వెళ్లనీయకుండా పోలీసులు అడ్డుకుంటున్నారు. దీంతో పవన్ కల్యాణ్ రుషికొండ ఎర్రమట్టి దిబ్బల క్షేత్రస్థాయి పర్యటనపై సర్వాత్రా ఉత్కంఠ నెలకొంది.