Tdpలో చేరిన మహాసేన రాజేశ్.. వెంటనే కీలక వ్యాఖ్యలు
దిశ, డైనమిక్ బ్యూరో: తెలుగుదేశం పార్టీలో చేరడం.. తనను కూడా భాగస్వామ్యం చేసుకోవడం ఎంతో సంతోషకరంగా ఉందని మహాసేన రాజేశ్ అన్నారు. 2019 ఎన్నికల్లో చంద్రబాబును ఒక విలన్‌గా చూపించారని, అది నమ్మి వైసీపీ గెలుపుకోసం పని చేశామని చెప్పారు. జరిగిన తప్పును తెలుసుకుని తాను తెలుగుదేశం పార్టీలో చేరినట్లు తెలిపారు. పెద్దాపురం నియోజకవర్గంలో మహాసేన రాజేశ్ తెలుగుదేశం పార్టీలో చేరారు. పార్టీ అధినేత చంద్రబాబు నాయుడు మహాసేన రాజేశ్‌కు పార్టీ కండువా కప్పి సాదరంగా ఆహ్వానించారు.
ఈ కార్యక్రమంలో మాజీమంత్రులు కేఎస్ జవహర్, గొల్లపల్లి సూర్యారావు, మాజీ డిప్యూటీ సీఎం చినరాజప్ప, వరుపుల రాజాతోపాటు పలువురు దళిత నేతలు పాల్గొన్నారు. ఇకనుంచి తెలుగుదేశం పార్టీ సైనికులుగా ప్రతీ గడపగడపకు వెళ్తామని చంద్రబాబు గతంలో దళితుల కోసం అమలు చేసిన పథకాలను వివరిస్తామని మహాసేన రాజేశ్ తెలిపారు. వచ్చే ఎన్నికల్లో తెలుగుదేశం పార్టీని గెలిపించుకోవాల్సిన అవసరం ఉందని లేకపోతే రాష్ట్రంసర్వనాశనం అయిపోతుందని మహాసేన రాజేశ్ వ్యాఖ్యానించారు.
