ఉక్రెయిన్‌కు అమెరికా రూ.16వేల కోట్ల సైనిక ప్యాకేజీ

దిశ, నేషనల్ బ్యూరో : రష్యాతో యుద్ధంలో ఉన్న ఉక్రెయిన్‌కు అమెరికా మరోసారి ఆపన్న హస్తాన్ని అందించింది. ఉక్రెయిన్‌కు రూ.16వేల కోట్ల సైనిక సహాయక ప్యాకేజీని అందిస్తామని అమెరికా విదేశాంగ మంత్రి ఆంటోనీ బ్లింకెన్ ప్రకటించారు. రెండు రోజుల ఉక్రెయిన్ పర్యటనలో ఉన్న బ్లింకెన్.. చివరి రోజైన బుధవారం రాజధాని కీవ్‌లో సహాయక ప్యాకేజీపై ప్రకటన చేశారు. రష్యాతో యుద్ధం వేళ ఉక్రెయిన్ రెడీ చేసుకున్న ధాన్యం ట్రాన్స్‌షిప్‌మెంట్ సౌకర్యం, బయోనిక్స్ కర్మాగారం, డ్రోన్ తయారీ కేంద్రాలను ఆంటోనీ బ్లింకెన్ సందర్శించారు. కష్టకాలంలో ఉక్రెయిన్ సమయోచితంగా వ్యవహరిస్తోందని ఆయన కితాబిచ్చారు. రష్యా దండయాత్ర మొదలైనప్పటి నుంచి ఉక్రెయిన్‌కు సంబంధించిన అంతర్జాతీయ షిప్పింగ్ రూట్లకు తీవ్ర అంతరాయం ఏర్పడింది. దీంతో రైలు మార్గాల ద్వారా ఉక్రెయిన్ నుంచి ఇరుగుపొరుగు దేశాలకు ధాన్యం ఎగుమతులు చేస్తున్నారు. ఉక్రెయిన్‌పై దాడులను రష్యా తీవ్రతరం చేసిన నేపథ్యంలో దేశ అధ్యక్షుడు వ్లాదిమిర్ జెలెన్స్కీ తన విదేశీ పర్యటనల షెడ్యూల్‌ను ప్రస్తుతానికి వాయిదా వేసుకున్నారు.