ఫ్లూయెంట్ ఇంగ్లీష్‌ మాట్లాడుతూ.. చెత్త ఏరుకుంటున్న మహిళ

దిశ, ఫీచర్స్: వేషధారణ చూసి ఒక వ్యక్తి టాలెంట్‌ను అంచనా వేయకూడదనే మాట వినే ఉంటారు. అది చాలామంది విషయాల్లో, చాలాసార్లు నిరూపితమైంది కూడా. ఈ క్రమంలో తాజాగా బెంగళూరు నగరంలో చెత్త ఏరుకునే ఓ మహిళ.. సోల్‌ఫుల్ వాయిస్‌లో ఫ్లూయెంట్‌గా ఇంగ్లీష్ మాట్లాడుతున్న వీడియో ఒకటి సోషల్ మీడియాలో వైరల్‌గా మారింది. షహీనా హెగ్గర్ అనే ఇన్‌స్టాగ్రామ్ యూజర్ ఈ వీడియోను అప్‌లోడ్ చేయగా.. వీడియోలో కనిపించిన మహిళ పేరు ‘సెసిలియా మార్గరెట్ లారెన్స్’ అని, ఆమె జపాన్‌లో ఆరు సంవత్సరాలు ఉందని తెలుస్తోంది.

బెంగళూరులోని సదాశివ నగర్‌లో చెత్త ఏరుకుంటున్న సెసీలియాతో షహీనా మాట్లాడినపుడు.. తను అద్భుతంగా మాట్లాడటంతో పాటు పాడుతూ ఆశ్చర్యపరిచింది. కాగా షహీనా ఈ వీడియోను షేర్ చేస్తూ ‘మీ చుట్టూ ఎన్నో కథలుంటాయి. ఒక్కసారి ఆగిచూడండి.. అందులో కొన్ని అందమైనవి ఉంటే, మరికొన్ని బాధాకరమైనవి ఉండొచ్చు. కానీ ఎటువంటి కలలు లేని జీవితం అంటే ఏమిటి.. ఈ స్పూర్తిదాయక మహిళతో మాట్లాడాలనుకుంటున్నా.. మీలో ఎవరైనా ఆమెను చూస్తే మమ్మల్ని సంప్రదించండి’ అని పోస్టు చేసింది. మరొక వీడియోలో ‘ఆమె మంచి పర్ఫార్మర్’ అని రాసుకొచ్చింది. ఈ వీడియో ఇంటర్నెట్‌లో వైరల్‌గా మారడంతో.. నెటిజన్లు పలు రకాలుగా స్పందిస్తున్నారు. ‘ఇది చాలా స్ఫూర్తిదాయకం, ఆమె ఒంటరిగా లేదు, ఆమె ఒంటరిగా లేదని చెప్పిన విధానం నాకు నచ్చింది’ అనే కామెంట్స్‌తో పాటు ఆమె గురించి తెలుసుకోవడం వల్ల జీవితంలో కొత్త పాఠం నేర్చుకున్నామనే కామెంట్స్ వస్తున్నాయి. కాగా బెంగళూరు హోలీ గోస్ట్ చర్చికి సెసిలియా ప్రతీ ఆదివారం వస్తుంటుందని పలువురు తెలిపారు.

ఇక ఇన్‌స్టాగ్రామ్‌లో ‘ceciliaed_always’ అనే పేజీ కూడా ఉండగా.. ఇందులో నగరం చుట్టూ విభిన్న స్టోరీ నేపథ్యాలు గల వ్యక్తుల పోస్ట్‌లు ఉన్నాయి. ఈ పేజీ లేటెస్ట్ పోస్ట్‌లో.. పర్పుల్ సీక్విన్ డ్రెస్‌లో ఉన్న ఒక మహిళ చిత్రంతో పాటు ‘జీవితం మీకు టమోటాలు ఇచ్చినప్పుడు మంచి మిరియాలతో మంచి టమోటా రసం తయారు చేసుకోండి. ఆ తర్వాత మీ పెదాలను చప్పరించడం మర్చిపోవద్దు.. సిసిలియా కోట్స్’ అనే క్యాప్షన్ ఉండటం విశేషం.

https://www.instagram.com/reel/CSazoZ8HelD/?utm_source=ig_web_copy_link