ఆ అడవిలో ఇద్దరు మావోయిస్టులను చంపారు

దిశ, భద్రాచలం: మావోయిస్టులు, భద్రతా బలగాలకు మధ్య జరిగిన ఎదురు కాల్పుల్లో ఇద్దరు మావోయిస్టులు మృతి చెందారు. ఛత్తీస్‌గఢ్ రాష్ట్రం దంతెవాడ జిల్లా కవాసిపార – బేర్ గుడ్రా అడవుల్లో శనివారం మధ్యాహ్నం 1.30 సమయంలో పోలీసులు, మావోయిస్టులకు మధ్య హోరాహోరీగా కాల్పులు జరిగాయి. అనంతరం ఘటనా స్థలంలో డీఆర్‌జీ బలగాలు ఇద్దరు మావోయిస్టుల మృతదేహాలు, ఒక 9 ఎంఎం పిస్టల్, మరో దేశీ కట్టా ఆయుధాలతోపాటు సుమారు 5 కిలోల ఐఈడీ, నక్సల్స్ యూనిఫామ్స్ స్వాధీనం చేసుకున్నారు. కుకొండ పోలీస్ స్టేషన్ పరిధిలో ఈ ఘటన చోటుచేసుకున్నట్లు దంతెవాడ ఎస్‌పీ అభిషేక్ పల్లవ్ తెలిపారు. ఎన్‌కౌంటర్ మృతుల్లో రూ.3లక్షల రివార్డు కలిగిన కటేకళ్యాణ్ ఎల్‌జీఎస్ డిప్యూటీ కమాండర్ మడివి హడమా, మరొకరు రూ. లక్ష రివార్డు గల ఈటేపాల్ జనమిలీషియా కమాండర్ అయితా అని పోలీసులు భావిస్తున్నారు.