ధూల్ పేట్ టు సంగారెడ్డి.. స్మగ్లింగ్‌లో ఆరితేరిన యువకులు

దిశ, సంగారెడ్డి: సంగారెడ్డి జిల్లాలో గంజాయి సరఫరా చేస్తున్న ఇద్దరు వ్యక్తులను పోలీసులు గురువారం అరెస్టు చేశారు. సంగారెడ్డి పట్టణ సీఐ రమేష్ కథనం ప్రకారం వివరాలిలా ఉన్నాయి. సంగారెడ్డి పట్టణంలోని కల్వకుంట్ల రోడ్డులో నాల్సాబ్ గడ్డ చౌరస్తా వద్ద ఖాళీ స్థలంలో ఇద్దరు వ్యక్తులు గంజాయి అలవాటు ఉన్నవారికి గంజాయి సరఫరా చేస్తున్నారు. ఈ మేరకు విశ్వాసనీయ సమాచారం రావడంతో సంగారెడ్డి పట్టణ సీఐ రమేష్, ఎస్సై కోటేశ్వరావు సిబ్బందితో కలిసి దాడులు చేశారు. అక్కడ ఇద్దరు వ్యక్తులు అనుమానాస్పదంగా కనిపించడంతో వారిని అదుపులోకి తీసుకొని సోదా చేసారు. వారి వద్ద నుంచి 110 గంజాయ్ ప్యాకెట్లు స్వాధీనం చేసుకున్నట్లు ఇన్స్పెక్టర్ రమేష్ తెలిపారు. హైదరాబాద్ ధూల్ పేట నుంచి గంజాయిని సంగారెడ్డికి సరఫరా చేస్తున్నట్లు పోలీసుల విచారణలో నిందితులు తెలిపారు. గంజాయి సరఫరా చేస్తున్న వాజిత్ ఖాన్, సయ్యద్ శౌకత్‌లపై కేసు నమోదు చేసి రిమాండ్‌కు తరలించినట్లు సిఐ రమేష్ తెలిపారు. నిందితులను పట్టుకోవడంలో చాకచక్యంగా వ్యవహరించిన ఇన్స్పెక్టర్ రమేష్, ఎస్‌ఐ కోటేశ్వర్‌లను డీఎస్పీ బాలాజీ అభినందించారు.