మున్సిపల్ కమిషనర్ల బదిలీలు

దిశ, సిటీ బ్యూరో: రాష్ట్ర మున్సిపల్ శాఖలోని పలు గ్రేటర్ మున్సిపల్ కార్పొరేషన్లు, కార్పొరేటన్లు, మున్సిపాలిటీల్లో కమిషనర్లుగా, స్పెషల్ గ్రేడ్ కమిషనర్లుగా విధులు నిర్వహిస్తున్న కమిషనర్లను బదిలీ చేస్తూ శుక్రవారం ప్రభుత్వం జీవో 806ను జారీ చేసింది. మొత్తం 15 మంది కమిషనర్లకు స్థాన చలనాన్ని కల్గిస్తూ ఈ ఉత్తర్వులు జారీ అయ్యాయి. వీరిలో కొందరు స్పెషల్ గ్రేడ్ -1 కమిషనర్లకు సైతం కీలక బాధ్యతలు అప్పగించారు. గ్రేటర్ హైదరాబాద్ మున్సిపల్ కార్పొరేషన్ లో అదనపు కమిషనర్ గా విధులు నిర్వహిస్తున్న జె. శంకరయ్యను నిజాంపేట మున్సిపల్ కమిషనర్ గా నియమిస్తూ ఆదేశాలు జారీ అయ్యాయి. అలాగే గ్రేటర్ వరంగల్ మున్సిపల్ కార్పొరేషన్ లో అదనపు కమిషనర్ గా విధులు నిర్వహిస్తున్న సీహెచ్ నాగేశ్వర్ ను మీర్ పేట మున్సిపల్ కార్పొరేషన్ కమిషనర్ గా సర్కారు నియమించింది. వీరితో పాటు జీహెచ్ఎంసీలోని వెటర్నరీ విభాగంలో డిప్యూటీ డైరెక్టర్ ఉన్న డా.రామకృష్ణారావును ఫీర్జాదిగూడ మున్సిపల్ కార్పొరేషన్ కమిషనర్ గా డిప్యూటేషన్ పై నియమించారు.

జీహెచ్ఎంసీలో జాయింట్ కమిషనర్ గా ఉన్న గ్రేడ్ వన్ మున్సిపల్ కమిషనర్ పి.రవీందర్ సాగర్ ను మిర్యాలగూడ మున్సిపల్ కార్పొరేషన్ కమిషనర్ గా నియమితులయ్యారు. మేడ్చల్ మున్సిపల్ కమిషనర్ బి. సత్యనారాయణరెడ్డి ని నిర్మల్ మున్సిపాల్టీకి కమిషనర్ నియమించారు. ప్రస్తుతం కమిషనర్, డైరెక్టర్ మున్సిపల్ అడ్మినిస్ట్రేషన్ ఆఫీసులో సూపరింటెండెంట్ గా విధులు నిర్వహిస్తున్న ఎస్ వీ. జానకిరామ్ సాగర్ ను గద్వాల్ మున్సిపల్ కమిషనర్ గా నియమితులయ్యారు. ఇబ్రహీంపట్నం మున్సిపల్ కమిషనర్ గా ఉన్న కే.జయంత్ కుమార్ రెడ్డిని షాద్ నగర్ మున్సిపాల్టీకి కమిషనర్ గా, గుండ్ల పోచంపల్లి మున్సిపల్ కమిషనర్ గా విధులు నిర్వహిస్తున్న కె.అమరేందర్ రెడ్డిని ఆధిభట్ల మున్సిపల్ కమిషనర్ గా నియమిస్తూ ఆదేశాలు జారీ అయ్యాయి. గ్రేడ్ 3 మున్సిపల్ కమిషనర్ డి. లావణ్యను గుండ్ల పోచంపల్లి కమిషనర్ గా బదిలీ చేశారు. టీయూఎఫ్ఐడీసీ అసిస్టెండ్ డైరెక్టర్ గా విధులు నిర్వహిస్తున్న ఎంఎన్ఆర్ జ్యోతిని తుర్కయంజాల్ మున్సిపల్ కమిషనర్ గా నియమించారు. కమిషనర్, డైరెక్టర్ మున్సిపల్ అడ్మినిస్ట్రేషన్ లో జాయింట్ డైరెక్టర్ గా విధులు నిర్వహిస్తున్న కె. ఫాల్జుణ్ కుమార్ ను మణికొండ మున్సిపాల్టీ కమిషనర్ గా నియమించారు. మణికొండ కమిషనర్ గా వ్యవహారిస్తున్న స్పెషల్ గ్రేడ్ మున్సిపల్ కమిషనర్ ఎస్. జయంత్ ను సీడీఎంఏ ఆఫీసులో జాయింట్ డైరెక్టర్ గా నియమించారు. గ్రేడ్ వన్ కమిషనర్ గా జీహెచ్ఎంసీలో విధులు నిర్వహిస్తున్న మహ్మద్ యూసుఫ్ ను ఇబ్రహీంపట్నం మున్సిపాల్టీ కమిషనర్ గా నియమించారు. పోస్టింగ్ కోసం ఎదురుచూస్తున్న అహ్మద్ సయఫుల్లాను మేడ్చల్ కమిషనర్ నియమించారు. పీఆర్, ఆర్ డీ విభాగంలో డీఎల్ పీఓగా విధులు నిర్వహిస్తున్న ఏ.జ్యోతిరెడ్డిని జవహర్ నగర్ మున్సిపల్ కార్పొరేషన్ కమిషనర్ గా నియమిస్తూ ఆదేశాలు జారీ అయ్యాయి.