ఆ యువకుడి మృతదేహం దొరికింది!

దిశ, జల్‌పల్లి : సరదాలో చెరువులో బోటింగ్‌కు వెళ్లి గల్లంతైన యువకుడి మృతదేహం లభ్యమైంది. బోటు బోల్తాపడి చెరువులో మునిగిపోయిన యువకుడి ఆచూకీ కోసం పోలీసులు మూడు రోజులుగా గాలింపు చర్యలు చేపట్టి శుక్రవారం వెలికితీశారు. బాలాపూర్​ ఇన్‌స్పెక్టర్ భాస్కర్ తెలిపిన వివరాల ప్రకారం..

ఉస్మాన్​నగర్‌కు చెందిన మహ్మద్​సాధిక్ (22), సాదత్​నగర్‌కు చెందిన మహ్మద్​ఫయాజ్​ఖాన్​(22) బుధవారం సాయంత్రం కయ్యాక్ బోట్‌లో బుర్హాన్ ఖాన్ చెరువులో షికారుకు వెళ్లారు. గట్టు వరకు వెళ్లి తిరిగి వస్తుండగా బోటు పల్టీ కొట్టింది. ఈ ఘటనలో సాధిక్ గల్లంతు కాగా, ఫయాజ్​ఖాన్ ఈదుకుంటూ రావడాన్ని గమనించిన స్థానికులు అతన్ని సురక్షితంగా రక్షించారు. సమాచారం అందుకున్న బాలాపూర్ పోలీసులు అప్పటి నుంచి గల్లంతయిన సాధిక్ ఆచూకీ కోసం గాలింపు చర్యలు చేపట్టగా శుక్రవారం మృతదేహం లభ్యమైంది. ఈ కేసును బాలాపూర్ పోలీసులు దర్యాప్తు చేస్తున్నారు.