రాతి విగ్రహాల ధ్వంసం.. ధర్నా చేస్తున్న భక్తులు

దిశ ప్రతినిధి, మహబూబ్‌నగర్/పెబ్బేరు : వనపర్తి జిల్లా పెబ్బేరు మండల కేంద్రంలో ఉన్న శ్రీ ధర్మశాస్త్ర అయ్యప్ప స్వామి ఆలయంలో ఉన్న రాతి విగ్రహాలను గుర్తుతెలియని దుండగులు ధ్వంసం చేశారు. తెల్లవారుజామున ఆలయ పూజారి గోపి స్వామి వెళ్లి చూడగా ఆలయ తలుపులు ధ్వంసం చేసి ఉండడం చూసి ఆశ్చర్యపోయారు. అనంతరం ఆలయం లోపల ఉన్న విగ్రహాలను పరిశీలించడంతో దుండగుల దాడిలో వినాయకుడు, సుబ్రహ్మణ్యస్వామి విగ్రహాలతో పాటు అమ్మవారి విగ్రహాలు ధ్వంసం అయినట్లు గుర్తించారు.

ఆ వెంటనే ఆయన ఆలయ కమిటీ సభ్యులకు సమాచారం ఇచ్చారు. కమిటీ సభ్యుల ఫిర్యాదు మేరకు ఎస్సై రామస్వామి సంఘటన స్థలానికి చేరుకొని వివరాలను పరిశీలించారు. విషయం తెలుసుకున్న పలువురు భక్తులు పెబ్బేరులోని సుభాష్ చౌరస్తా వద్దకు చేరుకొని ధర్నా నిర్వహిస్తున్నారు. విగ్రహాలను ధ్వంసం చేసిన దుండగులను గుర్తించి వెంటనే కఠినంగా శిక్షించాలని డిమాండ్ చేస్తున్నారు. కాగా పరిస్థితులు అదుపు తప్పకుండా ఉండేలా పోలీసులు చర్యలు చేపట్టారు. దుండగులను పట్టుకుంటామని ప్రజలకు హామీ ఇచ్చారు.