రోడ్‌సైడ్ హ‌లీమ్‌ని పాపుల‌ర్ చేసిన బ్రాండ్ అంబాసిడ‌ర్! (వీడియో)

దిశ‌, వెబ్‌డెస్క్ః స‌రిగ్గా రెండే రోజులు.. అయినా, మైండ్ బ్లోయింగ్ పాపులారిటీ! ప‌ట్టుమ‌ని ప‌దేళ్లు కూడా లేక‌పోయినా ప‌ట్టుప‌ట్టి మ‌రీ రోడ్డుపైన హ‌లీమ్ బండిని జబ‌ర్ద‌స్త్‌గా వైర‌ల్ చేశాడు. అవును, నిజం! రంజాన్ వ‌చ్చిందంటే హైద‌రాబాద్‌లో హ‌లీమ్ హ‌డావిడి మామూలుగా ఉండ‌దని అంద‌రికీ తెలిసిందే. పెద్ద‌పెద్ద బిర్యానీ హౌస్‌ల ముందు జిగేల్‌మ‌నిపించే లైట్ల మ‌ధ్య అమ్మే హ‌లీమ్ నోరురిస్తుంటుంది. ఎటు చూసిన హ‌లీమ్ డ‌బ్బాలు క‌నిపించే ఇంత కాంపిటీష‌న్‌లో ఓ ఐస్‌క్రిమ్ బండిలా ఉన్న వాహ‌నంపై అమ్మే హ‌లీమ్ ద‌గ్గ‌ర‌కు క్యూలు క‌ట్టేస్తున్నారు జ‌నం. దీనంత‌టికీ కార‌ణం ఓ బుడ్డోడు. తన తండ్రి వ్యాపారానికి మద్దతివ్వ‌మ‌ని కోరుతూ ఆ బాలుడు సోష‌ల్ మీడియాలో పెట్టిన అడ్వ‌ర్టైజ్‌మెంట్ సూప‌ర్‌గా వైరల్ అయ్యింది. ఒక్క ఆలోచ‌న న‌గ‌ర‌వాసులంద‌ర్నీ బండి ద‌గ్గ‌ర‌కి ర‌ప్పించింది.

మొహమ్మద్ అద్నాన్ అనే చిన్న పిల్లోడు ఇప్పుడు ప‌ప్పా హ‌లీమ్‌కు బ్రాండ్ అంబాసిడ‌ర్ అయ్యాడు. వ్యాపారాన్ని నిర్వహించడానికి కష్టపడుతున్న తన తండ్రికి సహాయం చేయడానికి సోషల్ మీడియాను వినియోగించుక‌న్నాడు అద్నాన్‌. ఇన్‌స్టాగ్రామ్ ఖాతా ఓపెన్‌ చేసి, న్యూస్ రిపోర్టింగ్ స్టేల్లో నెటిజన్లను ఆకర్షించే వీడియోలను పోస్ట్ చేయ‌డం ప్రారంభించాడు. లొకేషన్, మెనూ, ప్లేట్లూ, మెనూతో సహా అన్ని సంబంధిత వివరాలను షేర్ చేస్తూ అద్నాన్ వీడియోను త‌యారుచేశాడు. "దేఖియే యే హుమారే పప్పా బైటే హుయే హై. చికెన్ కి హలీమ్ హై. ప‌ప్పా కి హ‌లీమ్‌.." అంటూ అద్నాన్ ఎంతో నిజాయితీగా, అంత‌కుమించి క్యూట్‌గా చేసిన‌ ఈ వీడియో జ‌నాల్ని వ‌శ‌ప‌రుచుకుంది. అద్నాన్ వీడియో ఇంటర్నెట్‌లో వైరల్ అయిన తర్వాత, చాలా మంది ఫుడ్ బ్లాగర్లు, అతనికి, అతని తండ్రికి మద్దతుగా నిలిచారు. అద్నాన్ చిన్న ఐడియా త‌న‌ను సెల‌బ్రిటీని చేయ‌డ‌మే కాదు, త‌న‌ కుటుంబానికి భారీ లాభాన్ని ఇచ్చింది. ఇప్పుడు అద్నాన్ "ప‌ప్పా కి హ‌లీమ్‌"కి బ్రాండ్ అంబాసిడ‌ర్ మాత్ర‌మే కాదు, ఎంతో మందికి ప్రేర‌ణ‌..!