భాగ్యనగరంలో ఇవాళ్టి నుంచి బోనాల సందడి షురూ..

దిశ, వెబ్‌డెస్క్: ఆషాడం వచ్చిందంటే చాలు హైదరాబాద్‌లో బోనాల ఉత్సవాలు మొదలవుతాయి. ఇప్పటికే భాగ్యనగరమంతా ఘనంగా నిర్వహించేందుకు అధికారులు ఏర్పాట్లు పూర్తి చేశారు. తెలంగాణ సంస్కృతి సంప్రదాయాలను చాటే ప్రధాన పండుగల్లో ఒకటైన బోనాల సందడి నగరంలో ఈరోజు నుంచి ప్రారంభం కానుంది. గోల్కోండ జగదాంబిక అమ్మవారికి మొదటి పూజ నిర్వహించడంతో బోనాల సంబురాలు ప్రారంభమవుతాయి.

బోనాల కోసం గోల్కోండ కోటకు వచ్చే భక్తులకు అన్ని సౌకర్యాలు ఏర్పాటు చేశారు. పోలీస్ సిబ్బంది భారీ ఎత్తున అడుగడుగునా సీసీ కెమెరాల పర్యవేక్షణలో గోల్కొండ బోనాలను పర్యవేక్షించనున్నారు. హైదరాబాద్ అంతా బోనాల ఉత్సవాలతో మారుమోగనుంది. ఊరేగింపు, శివసత్తుల పూనకాలు, పోతరాజుల విన్యాసాలతో గల్లిగల్లిన అమ్మవార్లకు భక్తులు బోనాలు సమర్పించి మొక్కులు చెల్లించుకోనున్నారు.