టీ కాంగ్రెస్ రెండో జాబితా ప్రకటనకు ముహూర్తం ఫిక్స్

దిశ, వెబ్‌డెస్క్: టీ కాంగ్రెస్ ఎమ్మెల్యే అభ్యర్థుల రెండో జాబితా విడుదలకు ముహూర్తం ఖరారు అయింది. ఈ నెల 25 తర్వాత రెండో జాబితా రిలీజ్ కానుంది. దసరా తర్వాత కాంగ్రెస్ కేంద్ర ఎన్నికల కమిటీ భేటీ కానుంది. ఈ సమావేశంలో రెండో లిస్ట్‌కు ఆమోదం తెలిపిన తర్వాత రిలీజ్ చేయనున్నారు. శనివారం ఢిల్లీలోని కాంగ్రెస్ అగ్రనేత కేసీ వేణుగోపాల్ ఇంట్లో తెలంగాణ పార్టీ ముఖ్య నేతల సమావేశం జరిగింది. దాదాపు ఆరు గంటలపాటు జరిగిన ఈ సమావేశంలో పలు కీలక నిర్ణయాలు తీసుకున్నారు.

మిగిలిన స్థానాలకు అభ్యర్థుల ఖరారు, లెఫ్ట్, తెలంగాణ జనసమితి పార్టీలతో పొత్తులపై కూడా చర్చించారు. తెలంగాణ రాష్ట్ర వ్యవహారాల ఇంచార్జ్ మాణిక్ రావు ఠాక్రే, రేవంత్ రెడ్డి, ఉత్తమ్ కుమార్ రెడ్డితో పాటు పలువురు ముఖ్యనేతలు సమావేశానికి హాజరయ్యారు. భేటీ ముగిసిన అనంతరం మాణిక్ ఠాక్రే మాట్లాడుతూ.. అభ్యర్థుల జాబితాపై సుదీర్ఘంగా కసరత్తు జరుగుతోందని, సీనియర్ నేతలతో మాట్లాడామన్నారు. త్వరలోనే రెండో జాబితాను ప్రకటిస్తామని, లెఫ్ట్ పార్టీలతో చర్చలు కొనసాగుతున్నాయని ఠాక్రే స్పష్టం చేశారు.

ఇటీవల 50 మంది అభ్యర్థులతో కూడిన తొలి జాబితాను కాంగ్రెస్ విడుదల చేయనుంది. ఇందులో సీనియర్ నేతలందరి పేర్లు ఉన్నాయి. కొన్ని స్థానాల్లో ఆశావాహుల పోటీ బాగా ఎక్కువగా ఉంది. దీంతో పాటు లెఫ్ట్ పార్టీలకు నాలుగు సీట్లు కేటాయించాలని టీ కాంగ్రెస్ నిర్ణయించింది. అలాగే తెలంగాణ జనసమితి పార్టీతో పొత్తుకు కాంగ్రెస సై అంటోంది. ఇటీవల రాహుల్ గాంధీని కోదండరాం కలిసి పొత్తులపై చర్చలు జరిపారు. ఇవన్నీ కొలిక్కి వచ్చిన తర్వాత రెండో జాబితా విడుదల కానుంది.