సైబర్ నేరాల అదుపులో తెలంగాణ దేశంలోనే నెంబర్ వన్: DGP అంజనీకుమార్
సైబర్ నేరాలకు అడ్డుకట్ట వేయటంలో.. సైబర్ భద్రతలో తెలంగాణ పోలీసులు దేశంలోనే అగ్రస్థానంలో ఉన్నారని డీజీపీ అంజనీకుమార్అన్నారు.
దిశ, తెలంగాణ క్రైం బ్యూరో: సైబర్ నేరాలకు అడ్డుకట్ట వేయటంలో.. సైబర్ భద్రతలో తెలంగాణ పోలీసులు దేశంలోనే అగ్రస్థానంలో ఉన్నారని డీజీపీ అంజనీకుమార్ అన్నారు. సైబర్సెక్యూరిటీ–2023 అన్న అంశంపై ఢిల్లీ నుంచి గ్లోబల్ కౌంటర్ టెర్రరిజం కౌన్సిల్, డిజిటల్ ఇండియా కలిసి సంయుక్తంగా ఆన్లైన్‌లో నిర్వహించిన కాన్ఫరెన్స్‌లో డీజీపీ పాల్గొన్నారు. ఈ సందర్భంగా ఆయన మాట్లాడుతూ.. సైబర్ నేరాలకు కళ్లెం వేసేందుకు దేశంలోనే మొదటిసారిగా తెలంగాణ రాష్ర్టంలో సైబర్ సెక్యూరిటీ బ్యూరోను ప్రారంభించినట్టు తెలిపారు.
ఏయేటికాయేడు దేశవ్యాప్తంగా సైబర్నేరాలు పెరిగిపోతున్నట్టు చెప్పారు. తెలంగాణలో కూడా సైబర్నేరాలు పెరుగుతూ వస్తున్నాయన్నారు. 2019లో 2,691 కేసులు నమోదు కాగా.. ఆ మరుసటి సంవత్సరం వీటి సంఖ్య 5,024కు పెరిగిందని చెప్పారు. 2021లో 10,303 కేసులు రిజిష్టరవ్వగా గత యేడాది 15,217 కేసులు నమోదైనట్టు వివరించారు.
ఈ క్రమంలోనే సైబర్ నేరాలకు కళ్లెం వేసేందుకు పోలీస్ కమాండ్కంట్రోల్భవనంలో సైబర్సెక్యూరిటీ బ్యూరోను ఏర్పాటు చేసినట్టు చెప్పారు. ఈ బ్యూరోలో అయిదు వందల మంది సిబ్బందిని నియమించినట్టు తెలిపారు. వీరికి సైబర్ నేరాలు.. వాటిని అడ్డుకోవటానికి తీసుకోవాల్సిన చర్యలపై సంపూర్ణ అవగాహన కల్పించినట్టు చెప్పారు. రాష్ట్రంలోని ప్రతీ జిల్లాలో సైబర్ఇన్వెస్టిగేషన్ టీములను ఏర్పాటు చేసినట్టు తెలిపారు. టోల్ఫ్రీ నెంబర్ అయిన 1930తోపాటు 100 నెంబర్కు ఫోన్ చేసినా ఫిర్యాదులు స్వీకరిస్తున్నట్టు చెప్పారు.
సైబర్ఆర్థిక నేరాలకు సంబంధించిన కేసుల్లో 65కోట్ల రూపాయలను రికవరీ చేసినట్టు తెలియచేశారు. సైబర్ నేరాలపై ప్రజల్లో అవగాహన కల్పించేందుకు పెద్ద ఎత్తున కార్యక్రమాలు నిర్వహిస్తున్నట్టు వివరించారు. రాష్ర్టంలోని ఎనిమిది వందల పోలీస్స్టేషన్లలో ప్రత్యేక శిక్షణ ఇవ్వటం ద్వారా సైబర్వారియర్స్‌ను సిద్ధం చేసినట్టు చెప్పారు. ఒక్క హైదరాబాద్‌లోనే మైక్రోసాఫ్ట్‌తో పాటు ఆరు వందల ఐటీ కంపెనీలు ఉన్నాయన్నారు. వీటిల్లో పదిలక్షల మంది వరకు పని చేస్తున్నట్టు చెప్పారు.