తెలంగాణలో రెండు MLC స్థానాలకు షెడ్యూల్ విడుదల

దిశ, డైనమిక్ బ్యూరో: రాష్ట్ర శాసనమండలిలో రెండు ఖాళీ స్థానాలను భర్తీ చేయడానికి కేంద్ర ఎలక్షన్ కమిషన్ షెడ్యూలు విడుదల చేసింది. ఈ నెల 29 ఆ రెండు స్థానాలకు పోలింగ్ జరగనున్నది. ఇందుకోసం ఈ నెల 11న నోటిఫికేషన్ రిలీజ్ కానున్నది. ఎమ్మెల్యేలుగా ఎన్నికైన కడియం శ్రీహరి, పాడి కౌశిక్‌రెడ్డి ఎమ్మెల్సీలుగా చేసిన రాజీనామాను చైర్మన్ ఆమోదించడంతో ఆ రెండు స్థానాలూ ఖాళీగా ఉన్నాయి. వీరిద్దరూ ఎమ్మెల్యే కోటా కిందనే ఎన్నికయ్యారు. దీంతో ఈ రెండు స్థానాలకు ఈ నెల 29న పోలింగ్ నిర్వహించి అదే రోజున ఫలితాలను వెల్లడించనున్నట్లు కేంద్ర ఎన్నికల కమిషన్ పేర్కొన్నది. వాస్తవానికి వారిద్దరి పదవీకాలం 2027 నవంబరు 30 వరకూ ఉన్నది. కానీ రాజీనామా చేయడంతో ఇప్పుడు ఇద్దరి ఉప ఎన్నిక అనివార్యమైంది. ఇప్పుడు కొత్తగా ఎమ్మెల్సీలు ఎన్నికైనా అప్పటివరకే కొనసాగనున్నారు.

నోటిఫికేషన్ వెలువడడంతోనే నామినేషన్ల ప్రక్రియ కూడా ప్రారంభం కానున్నది. ఈ నెల 18వ తేదీ వరకు నామినేషన్లను దాఖలు చేసుకునే అవకాశమున్నది. ఈ నెల 22న నామినేషన్లను ఉపసంహరించుకోడానికి తుది గడువు. కేంద్ర ఎన్నికల సంఘం గురువారం సాయంత్రం విడుదల చేసిన షెడ్యూలు ఇలా ఉన్నది :

నోటిఫికేషన్ జారీ : జనవరి 11, 2024

నామినేషన్లు ప్రారంభం : జనవరి 11, 2024

దాఖలుకు తుది గడువు : జనవరి 18, 2024

స్క్రూటినీ ప్రాసెస్ : జనవరి 19, 2024

ఉపసంహరణకు గడువు : జనవరి 22, 2024

పోలింగ్ తేదీ : జనవరి 29, 2024

పోలింగ్ సమయం : ఉ. 9.00 గం. నుంచి సా. 4.00 గం. వరకు