"డబుల్" కష్టాలు.. నాలుగేళ్లయినా వసతులు శూన్యం

దిశ, మేడ్చల్ బ్యూరో: ఆర్భాటపు కేటాయింపులే తప్ప.. డబుల్ బెడ్ రూమ్ లలో కనీస వసతుల ఊసే లేదు. లబ్ధిదారులను హడావిడిగా డబుల్ ఇండ్లలోకి పంపించారు. కానీ ఇళ్లకు సంబంధించిన పట్టాలు మాత్రం ఇవ్వలేదు. కనీసం విద్యుత్, తాగునీటి వసతులు కల్పించలేదు. అంతర్గత రోడ్లు నిర్మించలేదు. జీహెచ్ఎంసీ గత ఎన్నికల్లో ఓట్ల కోసం అప్పటి బీఆ ర్ఎస్ సర్కార్ వేసిన ‘డబుల్’ స్టంట్.. ఇది అప్పటి కార్మిక శాఖ మంత్రి, ప్రస్తుత మేడ్చల్ ఎమ్మెల్యే చామకూర మల్లారెడ్డి ప్రతినిధ్యం నియోజకవర్గంలో డబుల్ బెడ్ రూం లబ్ధిదారుల పరిస్థితి అగమ్య గోచరంగా మారింది. పట్టాలు ఇప్పించడంతోపాటు కనీస వస తులు కల్పించాలని లబ్ధిదారులు నిత్యం కార్యాలయాలు, ప్రజాప్రతినిధుల చుట్టూ ప్రదక్షిణలు చేస్తు న్నారు. సోమవారం కీసర మండల కార్యాలయం ఎదుట లబ్ధిదారులు బైఠాయించి ఆందోళన చేపట్టారు. మౌలిక వసతులు కల్పించేవరకు ఆందోళన కొనసాగిస్తామని హెచ్చరించారు.

ఏళ్లుగా అదే అవస్థలు

మేడ్చల్ అసెంబ్లీ సెగ్మెంట్ లోని కీసర మండలం చీర్యాలలో 2016 నవంబర్ 28వ తేదీన 40 డబుల్ బెడ్ రూం ఇండ్ల నిర్మాణానికి శ్రీ కారం చుట్టారు. నాలుగేళ్ల తర్వాత 2020,అక్టోబర్ 7వ తేదీన గ్రేటర్ హైదరాబాద్ మున్సిపల్ ఎన్నికలను దృష్టిలో పెట్టుకుని లబ్దిదారులకు ఇళ్లు కేటాయించారు. అప్పటి మంత్రి మల్లారెడ్డి, జెడ్పీ చైర్మన్ శరత్ చంద్రారెడ్డి, నాటి కలెక్టర్ వాసం వెంకటేశ్వర్లు లబ్దిదారులను లాటరీ పద్ధతిలో ఎంపిక చేసి ఇళ్లు కేటాయించినట్లు ప్రకటించారు. వారికి ఇప్పటి వరకు పట్టాలు ఇవ్వకుండా కాలయాపన చేస్తున్నారు. ఇళ్ల కేటాయింపు సమయంలోనే ఇళ్లను నిజమైన లబ్ధిదారులకు కాకుండా బీఆ ర్ఎస్ కార్యకర్తలు, స్థానిక లీడర్ల అనుయాయులకే కేటాయించారని చీర్యాల గ్రామస్తులు పెద్ద ఎత్తున నిరసన తెలి పారు. దీంతో ఇండ్లను పొందిన లబ్దిదారులు నాటి నుంచి ఇక్కడే నివాసం ఉం టున్నారు. కొందరు పొద్దంతా ఉంటూ రాత్రి చీర్యాల గ్రామంలో నిద్రిస్తున్నారు. ఇళ్లు కేటాయించినా ఎక్కడ వారి ఇంటి ని ప్రభుత్వం తీసుకుంటుందన్న భయం తో బిక్కు బిక్క మంటూ జీవనం సాగిస్తున్నారు. ఇండ్లను కేటాయించినా అప్పటి ప్రభుత్వ పెద్దలుగానీ, ప్రస్తుతం కొత్తగా కాంగ్రెస్ ప్రభుత్వం కూడా కనీస సౌక ర్యాలు కల్పించలేదు.

కరెంట్, నీళ్లు లేక అవస్థలు..

సొంతింటి కల సాకారమైందనుకొని గం పెడాశతో కొత్త ఇంట్లో అడుగుపెట్టిన లబ్దిదారులు నిత్యం నరకం చవిచూస్తున్నారు. తాగేందుకు గుక్కెడు నీళ్లు లేవు. నీటి కోసం పక్కనున్న పంట పొలాలకు పరుగులు తీయాల్సి వస్తోందంటున్నా రు. తీరా అక్కడికి వెళ్లితే రైతులు రోజు నీళ్లు ఇవ్వాలా..? అంటూ చీదరించుకుంటున్నారని వాపోతున్నారు. పంట పొలాల నుంచి నీరు తీసుకొని వస్తుంటే చాలా సార్లు పొలాల గట్లపై జారిపడిన సందర్భాలున్నాయి. తాగునీటి ట్యాంకర్ ను పంపమంటే అధికార యంత్రాంగం పట్టించుకోవడంలేదని అసహనం వ్యక్తం చేస్తున్నారు. డబుల్ బెడ్రూం ఇండ్లను కట్టించినా.. కరెంట్ పోల్స్ కూడా ఏర్పాటు చేయలేదు. దీంతో రాత్రి కరెంట్ లేక చీమ్మ చీకట్లలో జాగారం చేయాల్సి వస్తుందంటున్నారు. చీకట్లో బయటకు వచ్చినందున బక్కని మల్ల మ్మను రెండు సార్లు పాము కాటేసింది. ఆమె ప్రాణాపాయం నుంచి బయటపడ్డారు. ఈ భయంతో పక్కనే ఉన్న కరెం ట్ పోల్స్ నుంచి అక్రమంగా విద్యుత్ ను వాడుతున్నందుకు, ఆ శాఖ అధికారులు ఒక్కో ఇంటిపై 5 కేసులు నమోదు చేసి వేధిస్తున్నట్లు లబ్ధిదారులు వాపోతున్నా రు. ఒక్కో ఇంటికి రూ. లక్షల్లో జరి నామా విధించారని ఆ డబ్బులు కట్టాల ని ఒత్తిడి తేస్తున్నట్లు ఆవేదన వ్యక్తం చేస్తున్నారు. అండర్ గ్రౌండ్ డ్రైనేజీ పైపు లు వేసినా.. ఆ పైపులైన్ల నుంచి ఇళ్లకు మురుగు నీరు బయటకు వెళ్లేందుకు ఔట్ ఫ్లో ఏర్పాటు చేయలేదు. దీంతో మురుగు నీరు బయటకు వెళ్లక తీవ్ర ఇబ్బందులు పడుతున్నారు. కోట్లాది రూపాయలతో ఇండ్లను కట్టించిన ప్రభు త్వం మౌలిక వసతులను కల్పించకపోవడంతో లబ్ధిదారులు నానా అవస్థలు పడుతున్నారు.

నీళ్లు లేక అవస్థలు

డబుల్ బెడ్రూం అని కట్టిన్రు నల్లానీళ్లు వస్తలేదు. కాల కృత్యాలకు ఇబ్బంది అవుతుంది. పక్క న పొలాల నుంచి బిందెలతో నీరు తెచ్చుకుంటున్నాం. నాలుగేళ్లుగా ఇట్లనే బతుకుతున్నం.. పెద్దసార్లకు ఎన్నిసా ర్లు చెప్పుకున్నా.. ఎమ్మెల్యే కాడికి ఎన్నిసార్లు పోయినా పట్టించుకుంటలేరు.

-సత్తెమ్మ, స్థానికురాలు

రెండు సార్లు పాము కాటేసింది

కరెంట్ లేక చీకటిలో బతుకుతున్నం. ఇప్పికీ ఇక్కడ కరెంట్ సౌలతి లేదు. చిన్న చిన్న పిల్లలున్నరు. 2 సార్లు నన్ను పాము కరిసింది. పానాలు పోయేది దేవుడి దయవల్ల బతికిన. రాత్రి పూట దోమలు ఎంత ఉంటయంటే.. కంటి మీద కునుకు కూడా రాదు.

- బక్కని మల్లమ్మ, స్థానికురాలు

పట్టాలు ఇయ్యలే..

కట్టినం ఇస్తమని హడావుడిగా ఇచ్చిండ్రు. నాలుగేళ్లయినా పట్టాలియ్యలే. కరెంట్, తాగునీటి కోసం దరఖాస్తు చేసుకోలేకపోతున్నాం. 40 ఇండ్లలో 200 మంది ఉన్నం. పక్కనున్న పంట పొలాల నీరే మాకు ఆధారం. కరెంట్ లేక పిల్లలు చదువుకోవడం లేదు.

-చంద్రకళ, స్థానికురాలు