రాజేంద్రనగర్ లో రెచ్చిపోతున్న కెమికల్ మాఫియా..

దిశ, శంషాబాద్ : గుట్టు చప్పుడు కాకుండా పరిశ్రమల వ్యర్ధాలు కెమికల్ తీసుకువచ్చి మూసిలో డంపు చేస్తుండగా రెడ్ హ్యాండెడ్ గా పట్టుకొని పోలీసులకు అప్పగించిన ఘటన అత్తాపూర్ పోలీస్ స్టేషన్ పరిధిలో చోటుచేసుకుంది. స్థానికులు తెలిపిన వివరాల ప్రకారం తాండూర్, కర్ణాటక, పటాన్చెరు, షాద్నగర్, కొత్తూరు తదితర పారిశ్రామిక వాడల్లో నుంచి కెమికల్ డంపింగ్ తీసుకువచ్చి గుట్టు చప్పుడు కాకుండా అర్ధరాత్రి అత్తాపూర్ పోలీస్ స్టేషన్ పరిధిలోని మూసిలో వదులుతున్నారు.

అది గమనించిన స్థానికులు మూసీలో కెమికల్ వదులుతున్న లారీని పట్టుకుని పోలీసులకు అప్పగించినట్లు తెలిపారు. పోలీసులు ఘటనా స్థలానికి చేరుకుని కెమికల్ వదులుతున్న ప్రాంతాన్ని పరిశీలించి కేసు నమోదు చేసి దర్యాప్తు చేస్తున్నట్లు తెలిపారు. స్థానికులు మాట్లాడుతూ గత కొన్ని రోజులుగా యదేచ్ఛగా రాత్రి సమయంలో ఇతర ప్రాంతాల నుంచి కెమికల్ లారీలు తీసుకువచ్చి పార్కింగ్ లో పెట్టి అర్ధరాత్రి సమయంలో అందరూ పడుకున్నాక మూసీలలో వదులుతున్నారని, ఈ ముఠాను గుర్తించి వారి పై కఠిన చర్యలు తీసుకొని, వారికి సహకరిస్తున్న అధికారుల పై కూడా క్రిమినల్ కేసులు నమోదు చేసి ఈ ప్రాంతంలో పోలీసుల గస్తీ పెంచాలని స్థానికులు కోరుతున్నారు.