మహిళ మెడలో గొలుసు చోరీకి యత్నం

దిశ, యాచారం: బైక్ పైన వచ్చిన ఒక వ్యక్తి ఇంట్లో ఉన్న మహిళను పిలిచి బంగారు గొలుసు చోరీకి యత్నించగా ఆ మహిళ ప్రతిఘటించడంతో దొంగ పారిపోయిన ఘటన గురువారం యాచారం పోలీస్ స్టేషన్ పరిధిలో చోటు చేసుకుంది. సీఐ ఏ నరసింహారావు తెలిపిన వివరాల ప్రకారం..మండల పరిధిలోని గున్ గల్ గ్రామానికి చెందిన పందుగుల గాయత్రి, (34) గృహిణి ఇంటిలో ఉండగా ద్విచక్ర వాహనం పైన వచ్చిన ఒక వ్యక్తి బయటకు రమ్మని పిలిచి అడ్రస్సు అడుగుతున్నట్టు నటించాడు. ఆ మహిళ తనకు తెలియదని చెప్పి తిరిగి ఇంటిలోకి వెళ్తుండగా వెనక నుంచి మెడలో ఉన్న బంగారు గొలుసు చోరీకి యత్నించాడు. మహిళ ప్రతిఘటించి అరవడంతో చుట్టుపక్కల వారు వస్తున్నట్లు గమనించి దొంగ బంగారు గొలుసును అక్కడే వదిలేసి పరారయ్యాడు. బాధితురాలి ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.