అనుమానాస్పదంగా ముఠా సంచారం

దిశ,మోత్కూరు: గుర్తు తెలియని వ్యక్తులు పూజలు చేస్తామంటూ మోత్కూరు మున్సిపల్ కేంద్రంలో గురువారం మధ్యాహ్నం అనుమానాస్పదంగా తిరుగుతున్నారు. నిర్మానుష్యంగా ఉన్న, ఇళ్లకు ఎక్కువగా తాళాలు వేసి ఉన్న వీధుల్లో..ఒంటరిగా ఉన్న మహిళల ఇళ్ల వద్దకు వచ్చి కారు దిగకుండానే దగ్గరకు రమ్మంటూ పిలుస్తున్నారు. దీంతో ఒక్కసారిగా మహిళలు ఆందోళనకు గురవుతున్నారు. రాజన్న గుడి నుంచి వచ్చామని చెబుతూ..పూజలు చేస్తామని, మీ పరిస్థితులు బాగా లేకపోతే బాగుచేస్తామని నమ్మబలుకుతున్నారు. ఇది గమనించిన ఒక యువకుడు వారిని నిలదీయడంతో..కారును మలుపుకొని చకాచకా వెళ్ళిపోయినట్లు స్థానికులు తెలిపారు.  ఇటువంటి వారి తోపాటు దొంగ స్వాముల పట్ల పోలీసులు నిఘా వేస్తే ప్రజలకు నష్టం కలగకుండా ఉంటుందని ప్రజలు అభిప్రాయపడుతున్నారు.