తెలంగాణలో కర్ణాటక ఫలితాలు రిపీట్.. ఎంపీ ఉత్తమ్ కుమార్ రెడ్డి

దిశ, తెలంగాణ బ్యూరో: తెలంగాణలో కర్ణాటక ఫలితాలు రిపీట్ కానున్నాయని ఎంపీ ఉత్తమ్​కుమార్​రెడ్డి పేర్కొన్నారు. గాంధీభవన్​లో ఆయన శనివారం మీడియాతో మాట్లాడుతూ.. కర్ణాటక రిజల్ట్స్​తప్పకుండా తెలంగాణ మీద ప్రభావం చూపుతాయన్నారు. ఇక్కడ కూడా అధికారం దక్కించుకుంటామన్నారు. బీఆర్ఎస్​ చేస్తున్న అవినీతి అంతా ఇంతా కదన్నారు. సీఎంవో నుంచి క్షేత్రస్థాయిలోని పోలీస్ స్టేషన్ల వరకు విచ్చలవిడిగా అవినీతిమయం అయినట్లు ఆరోపించారు. కేసీఆర్ ప్రభుత్వం కరప్షన్​కు కేరాఫ్​గా మారిందని విమర్శించారు.

దేశ వ్యాప్తంగా రాబోయేది కాంగ్రెస్ ​ప్రభుత్వమేనని పేర్కొన్నారు. కర్ణాటకలో బీజేపీకి చెంపపెట్టు రిజల్ట్ ఇవ్వడం సంతోషంగా ఉన్నదన్నారు. తెలంగాణలోనూ అసమర్థత, అవినీతి ప్రభుత్వానికి త్వరలోనే చెక్​పడనున్నదని స్పష్టం చేశారు. ఇక పార్టీకి వ్యతిరేకంగా తాను ఎప్పుడూ మాట్లాడలేదని ఉత్తమ్​ క్లారిటీ ఇచ్చారు. పార్టీ లో చిన్న సమస్యలు కామన్​ అని వాటిని అంతర్గతంగా చర్చించుకొని పరిష్కరించుకుంటామన్నారు. రాబోయే ఎన్నికల్లో అందరం కలిసి పనిచేస్తామన్నారు.