కాంగ్రెస్​ పార్టీకి గొట్టిముక్కల వెంగళరావు రాజీనామ..

దిశ, కూకట్​పల్లి : కోట్లాది రూపాయలు అందుకుని రాత్రికి రాత్రే బండి రమేష్ ​కు కూకట్​పల్లి కాంగ్రెస్​ టికెట్​ కెటాయించడం అన్యాయమని కూకట్​పల్లి కాంగ్రెస్​ పార్టీ నాయకుడు గొట్టిముక్కల వెంగళరావు అన్నారు. కూకట్​పల్లి కాంగ్రెస్​ పార్టీ టికెట్​ బండి రమేష్​కు కెటాయించడంతో వెంగళరావు కాంగ్రెస్​ పార్టీకి రాజీనామ చేస్తున్నట్టు ప్రకటించారు. శనివారం తన నివాసంలో ఏర్పాటు చేసిన విలేఖరుల సమావేశంలో గొట్టిముక్కల వెంగళరావు మాట్లాడుతూ గత 40 సంవత్సరాలుగా కూకట్​పల్లిలో కాంగ్రెస్​ పార్టీకి సేవలు అందించానని అన్నారు. కాంగ్రెస్​ పార్టీ అధికారంలో లేకున్నా నిరుత్సాహ పడకుండా ఎంత మంది హేళన చేసినా పార్టీ మారమని చెప్పి పార్టీని నమ్ముకుని ఉన్నానని అన్నారు. గతంలో జరిగిన ఎన్నికలలోను మూడు సార్లు స్థానికులకు టికెట్​ ఇవ్వకున్నా పార్టీ ఆదేశాలను శిరసావహిస్తూ అభ్యర్థుల కోసం పనిచేశానని అన్నారు.

పార్టీని నమ్ముకుని ఉన్నవారిని వదిలేసి కాంగ్రెస్​ పార్టీకి ఎన్నడు పని చేయని, కనీసం ఓటు వేయని వారికి, కాంగ్రెస్​ కండువా ఎలా వేసుకోవాలో తెలియని వ్యక్తిని తీసుకు వచ్చి కోట్లాది రూపాయలు తీసుకుని రాత్రికి రాత్రే టికెట్​ కెటాయించడం ఏందని ప్రశ్నించారు. బయటి వాళ్లకు టికెట్​ కెటాయిస్తే క్యాడర్​ దెబ్బతింటుందని అన్నారు. కాంగ్రెస్​ పార్టీ టికెట్​లను అమ్ముకుంటుందని, టీపీసీసీ అధ్యక్షుడు రేవంత్​ రెడ్డి తన ఇంటికి వచ్చి ఎంపిగా పోటీ చేస్తున్నానని చెబితే కష్టపడి పనిచేసి ఎంపీగా గెలిపించుకున్నామని అన్నారు. టికెట్​ ఇస్తానని రేవంత్​ రెడ్డి మోసం చేశాడని అన్నారు. కూకట్​పల్లి, శేరిలింగంపల్లిలో కాంగ్రెస్​ పార్టీ గెలవకుండా చూస్తానని, రెండు రోజుల తరువాత ఏ పార్టీలోకి వెళ్లాలో కార్యకర్తలతో చర్చించి చెప్తానని అన్నారు. రాజీనామ పత్రం పై సంతకం చేస్తు గొట్టిముక్కల వెంగళరావు కంటతడి పెట్టారు. ఈ కార్యక్రమంలో పీసీసీ డాక్టర్​ సెల్​ చైర్మన్​ విశ్వతేజేశ్వర్​ రావు, గూడెపు నాగరాజు, బషీర్​, ఫణేందర్​, రాజమల్లయ్య, గణేష్​, బండారి ప్రవీణ్​ గౌడ్​, అరుణ్​ గోవింద్​, గురుమూర్తి, సునీల్, మహిళా నాయకులు రేష్మ, కృషవేణి, సంధ్య, కల్పన తదితరులు పాల్గొన్నారు