మహారాష్ట్రలో కాంగ్రెస్ పార్టీ కి అపూర్వ స్పందన : నీలం మధు

దిశ, సంగారెడ్డి బ్యూరో : మహారాష్ట్రలో జరగనున్న అసెంబ్లీ ఎన్నికల్లో మహారాష్ట్ర ప్రజల నుంచి కాంగ్రెస్ పార్టీకి అపూర్వ స్పందన లభిస్తోందని మెదక్ పార్లమెంట్ కాంగ్రెస్ పార్టీ కంటెస్టెడ్ క్యాండిడేట్ నీలం మధు ముదిరాజ్ అన్నారు. ఆదివారం నాందేడ్ జిల్లాలోని నాయగావ్, దెగ్లూర్ అసెంబ్లీ నియోజకవర్గాల్లో కాంగ్రెస్ పార్టీ తరఫున ఆయన ప్రచారం నిర్వహించారు. నాయగావ్ నియోజకవర్గ కేంద్రంలో తెలంగాణ ముఖ్యమంత్రి రేవంత్ రెడ్డి బహిరంగ సభలో పాల్గొన్నారు. కొన్ని రోజుల కింద అనారోగ్యంతో కన్నుమూసిన నాందేడ్ లోక్ సభ ఎంపీ వసంతరావు చావన్ కుటుంబ సభ్యులను ముఖ్యమంత్రి రేవంత్ రెడ్డి వెంట కాంగ్రెస్ బృందంతో కలిసి పరామర్శించారు. ఈ సందర్భంగా నీలం మధు మాట్లాడుతూ… కాంగ్రెస్ పార్టీకి మహారాష్ట్ర ప్రజల నుంచి సంపూర్ణ మద్దతు లభిస్తుందన్నారు. ఎక్కడికి వెళ్లిన ప్రజలు కాంగ్రెస్ పార్టీకి బ్రహ్మరథం పడుతున్నారని తెలిపారు. ఈ ఎన్నికల్లో కాంగ్రెస్ పార్టీ నేతృత్వంలోని కూటమి ప్రభుత్వం విజయదుందుభి మోగించడం ఖాయమని ధీమా వ్యక్తం చేశారు.