Accident : కారు ఢీకొని జింక మృతి..

దిశ, చిన్నకోడూరు : కారు ఢీకొని జింక మృతి చెందిన సంఘటన మండల పరిధిలోని చర్లంకి రెడ్డిపల్లి గ్రామ స్టేజి వద్ద కరీంనగర్ జాతీయ రహదారి పై బుధవారం చోటు చేసుకుంది. గ్రామస్తులు తెలిపిన కథనం ప్రకారం చౌడారం అడవి నుండి జింక బయటకు వచ్చే సమయంలో కారు జింకను ఢీకొంది. రోడ్డు పక్కన పడి ఉన్న జింకను స్థానికులు వెళ్లి చూసేసరికే చనిపోయిందని తెలిపారు.

సంఘటనా స్థలానికి అటవీ శాఖ అధికారి శ్రీకాంత్, పంచాయతీ కార్యదర్శి రాజవ్వ చేరుకొని జింకను పరిశీలించారు. అనంతరం పోస్టుమార్టం నిమిత్తం సిద్దిపేట పశు వైద్య ఆస్పత్రికి తరలిస్తున్నట్లు ఫారెస్ట్ అధికారి శ్రీకాంత్ తెలిపారు. కాంగ్రెస్ నాయకులు అజ్జు యాదవ్, చిక్కుడు అనిల్ కుమార్ లు చేరుకొని జింక మృతికి కారకులు ఎంతటి వారైనా కఠినంగా శిక్షించాలని జిల్లా అధికారులకు విజ్ఞప్తి చేశారు.