ఈటల రాజేందర్ దిష్టిబొమ్మ దహనం..

దిశ, నాగర్ కర్నూల్ ప్రతినిధి: మునుగోడు ఉప ఎన్నికల్లో బీఆర్ఎస్ నుంచి కాంగ్రెస్ కు భారీ ఎత్తున ముడుపులు అందాయంటూ హుజూరాబాద్ ఎమ్మెల్యే ఈటల రాజేందర్, టీపీసీసీ అధ్యక్షుడు రేవంత్ రెడ్డిపై చేసిన ఆరోపణలను నిరసిస్తూ ఆదివారం నాగర్ కర్నూల్ జిల్లా కేంద్రంలోని ప్రధాన కూడలి వద్ద యూత్ కాంగ్రెస్ ఆధ్వర్యంలో ఈటల రాజేందర్ దిష్టిబొమ్మను దహనం చేశారు. ఈ సందర్భంగా జిల్లా యూత్ కాంగ్రెస్ అధ్యక్షుడు కొడితల్ల రాము మాట్లాడుతూ ఈటల చేసిన ఆరోపణలు నిజమే అయితే భాగ్యలక్ష్మి అమ్మవారి టెంపుల్ వద్ద ప్రమాణం చేసేందుకు ఎందుకు రాలేదో చెప్పాలని డిమాండ్ చేశారు.

నిరాధారమైన ఆరోపణలు చేసి రాజకీయంగా పబ్బం గడుపుకుంటున్నారని విమర్శించారు. తమ నాయకుడు రేవంత్ రెడ్డిపై ప్రజలకు పూర్తి విశ్వాసం ఉందన్నారు. బీఆర్ఎస్, బీజేపీలు అనవసరమైన ఆరోపణలు చేస్తూ కాంగ్రెస్ పై బురదజల్లేందుకు ప్రయత్నిస్తున్నాయని విమర్శించారు. ప్రజా సమస్యలపై ప్రశ్నిస్తూ ఎల్లప్పుడూ ప్రజలకు అండగా నిలిచే పార్టీ కాంగ్రెస్ యేనని అన్నారు. ఈ కార్యక్రమంలో యూత్ కాంగ్రెస్ నాయకులు కాటమోని హరీష్, ప్రవీణ్, అంకిత్ నాని, శ్రీకాంత్ ముదిరాజ్, రామకృష్ణ, నల్లగంటి రాము, మహేష్, వెంకటేష్, బాలకృష్ణ, శంకర్, కానాపురం శ్రీశైలం, అంజి తదితరులు పాల్గొన్నారు.