అసెంబ్లీలో రాజాసింగ్‌పై కేటీఆర్ ఫైర్.. మీరు బీజేపీ కాదంటూ సెటైర్

దిశ, డైనమిక్ బ్యూరో: తెలంగాణ అసెంబ్లీ సమావేశాలు కొనసాగుతున్నాయి. శుక్రవారం సభలో ప్రశ్నోత్తరాల సమయంలో రాజాసింగ్ ను ఉద్దేశించి మంత్రి కేటీఆర్ చేసిన వ్యాఖ్యలు ఆసక్తిగా మారాయి. ఇవాళ ఎస్ఆర్ డీపీ పనుల పురోగతిపై సభ్యులు అడిగిన ప్రశ్నలకు మంత్రి కేటీఆర్ సమాధానం ఇచ్చారు. ఈ సందర్భంగా రాజాసింగ్ ను ఉద్దేశించి మీరు బీజేపీ ఎమ్మెల్యే కాదంటూ కామెంట్ చేశారు. నిన్న బీఏసీ సమావేశం జరిగిందని.. బీజేపీ పార్టీ నాయకుడు ఒకరు 30 రోజుల పాటు సభ నిర్వహించాలని లేఖ రాస్తే కాంగ్రెస్ ఎమ్మెల్యేలు 20 రోజులు సభ జరపాలని డిమాండ్ చేశారని అయితే తీర ప్రశ్నోత్తరాల సమయంలో మా పార్టీకి చెందిన ఎమ్మెల్యేలు అందరం ఉంటే కాంగ్రెస్ ఎమ్మెల్యే ఒకరు, బీజేపీ ఎమ్మెల్యే ఒకరు మాత్రమే సభలో ఉన్నారని కేటీఆర్ చెప్పారు. దీంతో సభలోనే ఉన్న రాజాసింగ్ కలగజేసుకుని తాను కూడా ఇక్కడే ఉన్నానని చెప్పడంతో ‘మీరు బీజేపీ కాదని మీరు సస్పెండెడ్.. మీకు ఆవిషయం తెలియదేమో’ అంటూ మంత్రి కేటీఆర్ సెటైర్ వేశారు. కాంగ్రెస్, బీజేపీ పార్టీలకు ప్రజల పట్ల ఉన్న ప్రేమ, చిత్తశుద్ది ఇలా ఉందని విమర్శించారు. సభలో 30 నిమిషాలు కూర్చోలేని వారు బయట మాత్రం డైలాగులు చెబుతారని వీరందరిని ప్రజలు గమనిస్తున్నారని విమర్శించారు.