కొండగట్టు జేఎన్టీయూలో స్టూడెంట్ మిస్సింగ్..

దిశ, కొడిమ్యాల : కొండగట్టు జేఎన్టీయూ కళాశాలలో మెకానికల్ ఇంజనీరింగ్ చదువుతున్న ఓ విద్యార్థి మిస్సింగ్ చర్చనీయాంశంగా మారింది. కళాశాల ప్రిన్సిపాల్ డాక్టర్ ప్రభాకర్ తెలిపిన వివరాల ప్రకారం మెకానికల్ ఇంజనీరింగ్ సెకండియర్ చదువుతున్న ఏ.హితేష్ ఈనెల 19న పర్మిషన్ లేకుండా హాస్టల్ నుండి బయటకు వెళ్లినట్లు వివరించారు. హాస్టల్ కేర్ టేకర్ ద్వారా విషయం తెలుసుకున్న తాము బుధవారం కొడిమ్యాల పోలీసులకు ఫిర్యాదు చేసినట్లు తెలిపారు.

అదృశ్యమైన విద్యార్థి ఆంధ్రప్రదేశ్ రాష్ట్రంలోని పార్వతీపురం జిల్లా రావివలస గ్రామానికి చెందినట్లుగా సమాచారం. కాగా ఈ ఘటనపై పోలీసులను సంప్రదించగా కేసు నమోదు చేసుకుని దర్యాప్తు చేస్తున్నట్లు కానిస్టేబుల్ హర్ష రాజు తెలిపారు. మిస్సింగ్ అయిన విద్యార్థిని ఎవరైనా అపహరించారా? లేక వేరే ఇతర కారణాల వల్ల విద్యార్థి తనంత తానుగా హాస్టల్ నుండి వెళ్లిపోయాడా అనేది పోలీసుల దర్యాప్తులో తేలాల్సి ఉంది.