ఆర్టీసీ బస్సును ఢీకొట్టిన బైక్..అక్కడికక్కడే రైతు మృతి

దిశ,మానకొండూరు : కరీంనగర్ జిల్లా మానకొండూరు మండలం శంషాబాద్ వద్ద రాజీవ్ రహదారిపై బైక్ ను సిరిసిల్ల డిపోకు చెందిన ఆర్టీసీ బస్సు ఢీకొట్టింది. అక్కడిక్కడే రైతు మృతి చెందాడు. కుటుంబికులు, స్థానికులు తెలిపిన వివరాల ప్రకారం శంకరపట్నం మండలం చింతకుంట గ్రామానికి చెందిన రైతు కర్కా మల్లారెడ్డి (68)అనే వ్యక్తి గురువారం ఇంటి నుండి టు వీలర్ పై గట్టుదుద్దేనపల్లి పెట్రోల్ బంక్ లో బండిలో పెట్రోల్ పోయించుకొవడానికి వెళ్లి తిరిగి ఇంటికి వస్తున్నాడు.

సిరిసిల్ల డిపోకు చెందిన ఆర్టీసీ బస్సు వరంగల్ నుంచి కరీంనగర్ వైపు వస్తుండగా శంషాబాద్ సమీపంలో ఎదురుగా వస్తున్న బైకును ఢీ కొనడంతో బైకు ముందు టైరు కింద పడి కొద్దిదూరం ఈడ్చుకుంటూ వెళ్లగా తలమీది నుండి టైర్ వెళ్లడంతో తలకు తీవ్ర గాయాలు కాగా అక్కడికక్కడే మృతి చెందాడని తెలిపారు. భార్య కర్కా విజయలక్ష్మి ఫిర్యాదు మేరకు బస్సు డ్రైవర్ కడారి బుచ్చయ్య పై కేసు నమోదు చేసుకుని దర్యాప్తు చేస్తున్నామని మానకొండూరు సీఐ లక్ష్మీనారాయణ తెలిపారు.