కారు గుర్తుకు ఓటు వేసి అఖండ మెజార్టీతో గెలిపించండి

దిశ, శేరిలింగంపల్లి : చేసిన అభివృద్ధి పనులు, ప్రజల ఆశీర్వాదాలు, తమపై ఉన్న నమ్మకమే మరోసారి తనను ఎమ్మెల్యేగా గెలిపిస్తాయని శేరిలింగంపల్లి బీఆర్ ఎస్ అభ్యర్థి ఆరేకపూడి గాంధీ అన్నారు. ఎన్నికల ప్రచారంలో భాగంగా గురువారం కొండాపూర్ డివిజన్ పరిధిలోని ప్రేమ్ నగర్ బీబ్లాక్ లో గల హనుమాన్ దేవాలయంలో స్థానిక కార్పొరేటర్ హామీద్ పటేల్, బీఆర్ఎస్ పార్టీ శ్రేణులతో కలిసి ప్రత్యేక పూజలు చేశారు. ప్రేమ్ నగర్ ఏ బ్లాక్, ప్రేమ్ నగర్ బీబ్లాక్, మార్తాండ్ నగర్, హనీఫ్ కాలనీలలో ఇంటింటి ప్రచారం చేశారు. ఈ సందర్భంగా ఎమ్మెల్యే గాంధీ మాట్లాడుతూ..రాబోయే ఎన్నికల్లో ప్రతీ ఒక్కరూ కారు గుర్తుకు ఓటు వేసి అఖండ మెజారిటీతో గెలిపించాలని కోరారు.

    సీఎం కేసీఆర్, మంత్రి కేటీఆర్ సహకారంతో అభివృద్ధి, సంక్షేమం అనే నినాదంతో 9 వేల కోట్ల రూపాయల నిధులతో శేరిలింగంపల్లి నియోజకవర్గాన్ని అన్ని రంగాలలో అభివృద్ధి చేశామని అన్నారు. మహిళ పక్షపాతి, మైనార్టీల సంక్షేమానికి కృషి చేస్తున్న దేశంలోనే ఏకైక ముఖ్యమంత్రి కేసీఆర్ అని, అనేక సంక్షేమ పథకాలతో అలరిస్తున్నారని తెలిపారు. కల్యాణ లక్ష్మి, షాదీ ముబారక్ ద్వారా పేదింటి ఆడపిల్లకు రూ.1,00,116 ఇవ్వడం జరుగుతుందని, ఆసరా పింఛన్లు, ఒంటరి మహిళా పింఛన్లు, కేసీఆర్ కిట్, కంటి వెలుగు, రైతు బంధు ఇలా అనేక పథకాలను ప్రవేశ పెట్టారని గుర్తు చేశారు. హైదరాబాద్ ను విశ్వనగరంగా తీర్చిదిద్దడంలో భాగంగా ప్రజలకు మెరుగైన జీవన ప్రమాణాలు పెంపొందించేందుకు, మౌలిక వసతుల కల్పనకు సీఎం కేసీఆర్ పెద్ద పీట వేస్తున్నారని అన్నారు. రానున్న ఎన్నికల్లో బీఆర్ఎస్ కారు గుర్తుకు ఓటువేసి భారీ మెజారిటీతో గెలిపించాలని కోరారు. ఈ కార్యక్రమంలో బీఆర్ఎస్ పార్టీ నాయకులు, కార్యకర్తలు, బీఆర్ఎస్ పార్టీ అనుబంధ సంఘాల ప్రతినిధులు, కార్యకర్తలు తదితరులు పెద్ద సంఖ్యలో పాల్గొన్నారు.