రాష్ట్రవ్యాప్తంగా ముస్లింల దావత్.. నిధులకు నో ఢోకా

దిశ, తెలంగాణ బ్యూరో: రాష్ట్రవ్యాప్తంగా ముస్లింల దావత్ ఏ ఇఫ్తార్ విందును ఘనంగా నిర్వహించాలని డిప్యూటీ సీఎం భట్టి విక్రమార్క మల్లు అధికారులను ఆదేశించారు. శనివారం అసెంబ్లీ సమావేశ మందిరంలో ఇఫ్తార్ విందు, రంజాన్ పండుగ ఏర్పాట్లను ఆయన మంత్రి పొన్నం ప్రభాకర్, ప్రభుత్వ సలహాదారుడు మహ్మద్​షబ్బీర్ అలీతో కలిసి సమీక్షించారు. ప్రతి సంవత్సరం ఆనవాయితీగా నిర్వహించే ఇఫ్తార్​విందు కార్యక్రమాలకు ఎలాంటి నిధుల కొరత లేదని డిప్యూటీ సీఎం తెలిపారు. ఈ విందు కోసం ఆహారంలో నాణ్యత, ప్రోటోకాల్, సౌకర్యాల కల్పనలో అధికారులు ఎలాంటి రాజీ పడాల్సిన అవసరం లేదన్నారు. ఇఫ్తార్​విందు ఏర్పాట్లలో అధికారులు ఏమాత్రం అశ్రద్ధ వహించరాదని, చిన్న పొరపాటు కూడా అవకాశం లేకుండా చూడాలని డిప్యూటీ సీఎం తెలిపారు. ఈ వేడుకలో లా అండ్ ఆర్డర్, ఎలక్ట్రిసిటీ, మంచినీరు తదితర అంశాలకు ఇబ్బంది లేకుండా చూసుకోవాలని కోరారు. వీటి ఏర్పాట్లలో ఎలాంటి అనుమానాలు, ఇబ్బందులు ఎదురైనా అధికారులు మొహమాట పడకుండా హైదరాబాద్​జిల్లా ఇన్చార్జి మంత్రి పొన్నం ప్రభాకర్ లేదా తన దృష్టికి తీసుకురావాలని ఆదేశించారు. ఇఫ్తార్​విందు ఏర్పాట్లకి గాను ప్రభుత్వ సలహాదారులు, ఏర్పాట్ల కమిటీ వైస్ చైర్మన్ మహ్మద్​షబ్బీర్ అలీ ఇక రోజువారిగా సమీక్ష చేస్తారని తెలిపారు.

ఈ సమావేశంలో మంత్రి పొన్నం ప్రభాకర్ మాట్లాడుతూ రంజాన్ పవిత్ర మాసంలో ముస్లిం సోదరులకు ఏలాంటి అసౌకర్యం లేకుండా ప్రభుత్వం అన్ని ఏర్పాట్లు చేసిందన్నారు. ముస్లింల దావత్ ఏ ఇఫ్తార్ విందును కూడా ఘనంగా చేస్తామని తెలిపారు. ప్రభుత్వ సలహాదారు, మాజీ మంత్రి షబ్బీర్ అలీ మాట్లాడుతూ తమ ప్రభుత్వం దావత్ ఏ ఇఫ్తార్ విందును ఘనంగా నిర్వహిస్తుందని అన్నారు. ఇఫ్తార్​విందుకు సంబంధించిన అన్ని విభాగాల అధికారులు ఈ సమావేశంలో పాల్గొన్నారు.