12 వెల్త్ క్యాపిటల్ సర్వీస్ ప్రైవేట్ లిమిటెడ్ కంపెనీ భారీ మోసం

దిశ, శేరిలింగంపల్లి :  బై బ్యాక్ పాలసీ స్కీమ్, డబుల్ గోల్డ్ స్కీమ్ పేరుతో అమాయకుల నుంచి డిపాజిట్లు వసూలు చేసి, వారికి ఇచ్చిన హామీ మేరకు వడ్డీ చెల్లించకుండా ప్రజల నుంచి భారీ మొత్తంలో వసూలు చేసిన ఎనిమిది మంది నిందితులను సైబరాబాద్ ఈవోడబ్ల్యూ పోలీసులు అరెస్ట్ చేశారు. తమ కంపెనీ 12 వెల్త్ క్యాపిటల్ సర్వీసెస్ ప్రైవేట్ లిమిటెడ్ గోల్డ్ స్కీమ్ లలో పెట్టుబడులు పెడితే అధిక మొత్తంలో తిరిగి చెల్లిస్తామని అమాయకుల చేత పెట్టుబడులు పెట్టించిన నిర్వాహకులు అమాయకుల వద్ద నుంచి భారీగా వసూళ్లకు పాల్పడ్డారు. వారిని నమ్మి అనేకమంది పెట్టుబడులు పెట్టారు. వాటిని తిరిగి చెల్లించకుండా నిందితులు 12 వెల్త్ క్యాపిటల్ సర్వీసెస్ ప్రైవేట్ లిమిటెడ్ నిర్వాహకులు మోసం చేశారు.

దీంతో కూకట్ పల్లి హౌసింగ్ బోర్డుకు చెందిన బాధితుడు నాయని హరికాంత్ పోలీసులకు ఫిర్యాదు చేశారు. కేసు నమోదు చేసుకున్న సైబరాబాద్ ఈఓడబ్ల్యూ పోలీసులు దర్యాప్తు చేపట్టారు. కలిదిండి పవన్ కుమార్ 12 వెల్త్ క్యాపిటల్ సర్వీసెస్ ఎండీ, రావుల సత్యనారాయణ, బొద్దులు హరికృష్ణ, వల్లూరు భాస్కర్ రెడ్డి, పగడాల రవి కుమార్ రెడ్డి, కొల్లాటి జ్యోతి, కురళ్ల మౌనిక, కుర్కుల లావణ్యలు ఓ జట్టుగా ఏర్పడి 12 వెల్త్ క్యాపిటల్ సర్వీసెస్ పేరుతో కంపెనీ ఏర్పాటు చేశారు. బై బ్యాక్ ఓపెన్ ప్లాట్స్ స్కీమ్‌ని 25 నెలలకు ( రూ.8 లక్షల 8 వేలు) ప్రవేశపెట్టారు. ఇందులో ప్రతి వినియోగదారుడు కనీసం 2 గుంటల భూమిని కొనుగోలు చేయాలి, దీని కోసం వినియోగదారులు రూ. రిజిస్ట్రేషన్ ఛార్జీలు కలిపి రూ. 8.08 లక్షలు. దాని కోసం కంపెనీ ప్రతి కస్టమర్‌కు ప్రతి నెలా 4శాతం లాభం ఇస్తుంది, ఇది 25 నెలలకు నెలకు రూ.32,000 వేలు తిరిగి చెల్లిస్తామని హామీ ఇచ్చారు.

బిజినెస్ అసోసియేట్‌కి 1శాతం కమీషన్ ఇస్తామని హామీ ఇచ్చారు. అలాగే డబుల్ గోల్డ్ స్కీమ్ కింద కస్టమర్ రూ. 4 లక్షల వరకు కనీస పెట్టుబడి పెడితే కంపెనీ కస్టమర్‌కు బాండ్ రసీదుని ఇస్తుంది. 12 నెలల వ్యవధి పూర్తయిన తర్వాత, చివరిలో వారు రూ. 8 లక్షల విలువైన స్విట్జర్లాండ్ ముద్రతో ఉన్న బంగారం బిస్కెట్లను అందిస్తుంది. ఈ గోల్డ్ చిట్స్ స్కీమ్ 20 నెలల ప్లాన్ కింద, కస్టమర్లు రూ. 5 లక్షలు ఇస్తామని యాజమాన్యం హామీ ఇచ్చింది. 19 నెలలకు 3 శాతం వడ్డీగా నెలకు రూ.15వేల చొప్పున తిరిగి ఇస్తామని హామీ ఇచ్చారు. ఈ విధంగా నిందితులు సుమారు 3600 మంది సభ్యుల నుండి రూ.300 కోట్ల వరకు వసూల్ చేసినట్లు పోలీసుల దర్యాప్తులో తేలింది. దీంతో 12 వెల్త్ క్యాపిటల్ సర్వీస్ ప్రైవేట్ లిమిటెడ్ నిర్వాహకులను అరెస్ట్ చేసి రిమాండ్ కు తరలించినట్లు పోలీసులు తెలిపారు.