చైల్డ్ పోర్నోగ్రఫీ కేసుల్లో హైదరాబాద్ టాప్

దిశ, తెలంగాణ క్రైం బ్యూరో: విశ్వనగరంగా చెప్పే హైదరాబాద్ ​చైల్డ్​పోర్నోగ్రఫీ నేరాల్లో దేశంలోనే మొదటి స్థానంలో నిలిచింది. ఈ వీడియోలను చూడటానికి అలవాటు పడ్డవారిలో కొందరు వాట్సాప్ గ్రూపుల్లో షేర్​చేస్తుండగా మరికొందరు వేర్వేరు సెర్చ్​ఇంజన్ల నుంచి చైల్డ్​పోర్నోగ్రఫీకి చెందిన వీడియోలను సేకరించి వేర్వేరు ప్లాట్​ఫాంలలో అప్​లోడ్ చేస్తున్నారు. ఇక్కడ గమనించాల్సిన అంశం ఏమిటంటే ఈ వికృత చేష్టలకు పాల్పడుతున్న వారిలో ఎక్కువగా ఐటీ ఉద్యోగులు, విద్యార్థులు, ప్రభుత్వ ఉద్యోగులు ఉండటం. దీన్ని అరికట్టటానికి నోడల్​ఏజెన్సీగా వ్యవహరిస్తున్న రాష్ర్ట సీఐడీ శాఖ అంతర్జాతీయ సంస్థలు, టిప్​లైన్​ ద్వారా అందుతున్న ఫిర్యాదులతో కేసులు నమోదు చేసి కొందరిని అరెస్టు చేస్తున్నా ఈ తరహా నేరాలు పెరిగుతూనే ఉన్నాయి. ఫలితంగా చిన్న వయసులోనే వీటిని చూడటానికి అలవాటు పడుతున్న వారు క్రమంగా మానసిక రోగులుగా మారుతున్నారు. ఇంకొందరు నేరాలకు పాల్పడుతున్నారు.

టెక్నాలజీ దుర్వినియోగం..

అరచేతిలోకి వచ్చేసిన ఆండ్రాయిడ్ ఫోన్లు, అందుబాటులోకి వచ్చిన ఇంటర్నెట్ ​సానుకూలంగా ఉపయోగించుకుంటున్న వారికి ప్రయోజనాలు కలిగిస్తుంటే దుర్వినియోగానికి వాడుతున్న వారిని తప్పుడు దారులు పట్టిస్తోంది. సైకాలజిస్ట్ ​అయిన డాక్టర్ ​గోపి చెప్పిన ప్రకారం మొబైల్​ఫోన్లలో ఇంటర్నెట్ ను ఉపయోగించుకుంటున్నవారిలో 15 నుంచి 30 సంవత్సరాలలోపు వయసున్న వారే అధికంగా ఉన్నారు. వీళ్లల్లో చాలామంది పోర్న్​సైట్లు చూడటం మొదలుపెట్టి కొన్నిరోజుల్లోనే దానికి బానిసలుగా మారుతున్నారు. వీరిలో కొందరు చూడటంతో ఆగక వేర్వేరు సైట్ల నుంచి చైల్డ్​పోర్నోగ్రఫీకి చెందిన వీడియో క్లిప్పింగులను డౌన్​లోడ్​ చేసి తమ వాట్సాప్, టెలీగ్రాం గ్రూపుల్లో స్నేహితులకు షేర్ ​చేస్తున్నారు. దీనికి నిదర్శనంగా ఈ తరహా నేరానికి పాల్పడి అరెస్టయిన అంబర్​పేట నివాసి శ్రీనివాస్​ఉదంతాన్ని పేర్కొనవచ్చు. ఎంసీఏ విద్యార్థి అయిన శ్రీనివాస్ ​వేర్వేరు సైట్ల నుంచి అశ్లీల వీడియోలు డౌన్​లోడ్ ​చేసి వాటిని షేర్ ​చేస్తూ చివరకు కటకటాల పాలయ్యాడు. ఆ తరువాత కొన్నిరోజులకే ఇంటర్నెట్​లో చైల్డ్​పోర్నోగ్రఫీ వీడియోల కోసం సెర్చ్​ చేస్తూ కాచిగూడకు చెందిన ప్రశాంత్, తార్నాకకు చెందిన మహ్మద్​ ఫిరోజ్ ​పోలీసుల చేతికి చిక్కిపోయారు.

నేరాల బాటలోకి..

చైల్డ్​పోర్నోగ్రఫీ వీడియోలు చూడటానికి అలవాటు పడుతున్న వారిలో కొందరు నేరాలకు పాల్పడుతున్నారు. వీరిలో పదిహేనేళ్ల మైనర్లతోపాటు యాభై సంవత్సరాల వయసున్నవాళ్లూ ఉన్నారు. వీడియోల్లో చూసినట్టుగా వికృత వాంఛలను తీర్చుకోవటానికి చిన్నారులను బలి చేస్తున్నారు. దీనికి నిదర్శనంగా బోరబండ పోలీస్​స్టేషన్ ​పరిధిలో ఓ వ్యక్తి ఏడేళ్ల బాలునిపై వరుసగా కొన్నిరోజులపాటు లైంగిక దాడి చేయటాన్ని పేర్కొనవచ్చు. సదరు వ్యక్తి పెడుతున్న హింసను భరించలేకపోయిన బాధితుడు చివరకు తల్లిదండ్రులకు విషయం చెప్పటంతో వాళ్లు పోలీసులకు ఫిర్యాదు చేశారు. కొన్నిరోజుల క్రితం హయత్​నగర్ ​పోలీస్​స్టేషన్ ​పరిధిలో ఇలా అశ్లీల వీడియోలు చూడటానికి అలవాటుపడ్డ ఐదుగురు 10వ తరగత విద్యార్థులు తమ సహ విద్యార్థినిపై లైంగిక దాడికి పాల్పడ్డారు. ఇలా చెబుతూ పోతే ఎన్నో ఉదంతాలున్నాయి.

అరెస్టులు చేస్తున్నా..

ఈ తరహా నేరాలను అరికట్టటానికి రాష్ర్ట సీఐడీ శాఖ నోడల్​ ఏజెన్సీగా పని చేస్తోంది. అంతర్జాతీయ సంస్థలతోపాటు టిప్​లైన్ ​ద్వారా అందుతున్న సమాచారంతో కేసులు నమోదు చేసి నిందితులను అరెస్టు చేస్తోంది. సీఐడీకి చెందిన ఓ సీనియర్​ అధికారి తెలిపిన ప్రకారం జనవరి నుంచి నవంబర్​ వరకు చైల్డ్​పోర్నోగ్రఫీకి సంబంధించి 31 కేసులు నమోదయ్యాయి. వీటిలో 43మందిని అరెస్టు కూడా చేశారు. ఇంటర్నెట్​లోకి వెళ్లి చైల్డ్​పోర్నోగ్రఫీకి సంబంధించిన వీడియోల కోసం సెర్చ్​ చేసినా, సోషల్​మీడియాలో అప్​లోడ్​చేసినా అన్ని వివరాలు ఎన్సీఆర్బీలోని ప్రత్యేక వింగ్​లో నమోదవుతాయని ఆయన తెలిపారు. దీంతోపాటు అమెరికాతోపాటు పలు దేశాల్లో ఈ తరహా నేరాలను అరికట్టటానికి వేర్వేరు ఏజెన్సీలు పని చేస్తున్నాయని చెప్పారు. అవి కూడా తమకు సమాచారాన్ని అందిస్తాయన్నారు. ఇక టిప్​లైన్ ​పేర ఇలాంటి నేరాలకు సంబంధించిన వివరాలను సేకరిస్తున్నట్టు వెల్లడించారు. ఐటీ యాక్ట్​2000 ప్రకారం చైల్డ్​ పోర్నోగ్రఫీ వీడియోల కోసం సెర్చ్ ​చేసినా, వాటిని అప్​లోడ్ ​చేసినా నేరమని స్పష్టం చేశారు. ఇలాంటి కార్యకలాపాలకు పాల్పడి పట్టుబడిన వారికి కఠిన శిక్షలు పడతాయన్నారు.

పోర్నోగ్రఫీ కేసులు

----------------------------------

హైదరాబాద్​ 22

జైపూర్​ 10

చెన్నై 6

బెంగళూరు 4

పూణె 4

కొచ్చి 2

నాగ్​పూర్​ 1

ముంబై 3

దేశవ్యాప్తంగా 52