అసెంబ్లీ ఎవడబ్బ సొత్తు..! పొంగులేటిపై ఎంపీ రవిచంద్ర ఫైర్

దిశ, సత్తుపల్లి : బీఆర్ఎస్ బహిష్కృత నేత పొంగులేటి శ్రీనివాసరెడ్డి‌పై రాజ్యసభ ఎంపీ వద్దిరాజు రవిచంద్ర ఫైర్ అయ్యారు. సత్తుపల్లి పట్టణ బీఆర్ఎస్ ఆత్మీయ సమావేశం‌లో రవిచంద్ర మాట్లాడుతూ.. అసెంబ్లీ గెట్ నీ అబ్బ సొత్తు కాదన్నారు. బరాబర్ ఖమ్మం జిల్లా బీఆర్ఎస్ ఎమ్మెల్యేలు అసెంబ్లీ‌లో అడుగు పెడతారన్నారు. నీకో రాజకీయ జెండా లేదు.. ఎజెండా లేదని పొంగులేటిని ఉద్దేశించి విమర్శించారు. అమాయకులైన నలుగురు నాయకులను వెంటేసుకుని తిరుగుతున్నావన్నారు.

పొంగులేటి వెంట తిరిగే వారికి రాజకీయంగా అన్యాయం జరగడం ఖాయమన్నారు. కేసీఆర్, కేటీఆర్ ఇచ్చిన అవకాశాన్ని రాజకీయంగా దుర్వినియోగం చేసుకున్నావని మండిపడ్దారు. కానీ అదే క్రమంలో ఆర్థికంగా లాభపడ్డావన్నారు. అసెంబ్లీ, ఎమ్మెల్సీ ఎన్నికల్లో బీఆర్ఎస్ టికెట్‌లు ఇచ్చిన వారిని ఓడించడానికి కుయుక్తులు పన్నావని ఆరోపించారు. అయినా కేసీఆర్ ఓపికతో ఎదురు చూశారన్నారు. కానీ పొంగులేటిలో మార్పు రాలేదన్నారు. ఇటుక, ఇటుక పేర్చి కేసీఆర్ ఖమ్మం జిల్లాలో బీఆర్ఎస్ పార్టీని శక్తి వంతంగా చేశారన్నారు. బీఆర్ఎస్‌ను ఓడించడం ఎవరి తరం కాదన్నారు.