ఇది అనిల్ కుమార్ గెలుపు కాదు.. యువజన కాంగ్రెస్ విజయం: MP అనిల్

దిశ, తెలంగాణ బ్యూరో: తెలంగాణలో హిస్టారికల్ డే అని ఎంపీ అనిల్ కుమార్ యాదవ్ అన్నారు. అనిల్ కుమార్ రాజ్యసభ్యుడిగా ఎన్నికైనట్లు ధ్రువీకరణ పత్రం తీసుకున్న తర్వాత ఎమ్మెల్యే బీర్ల అయిలయ్య, టీపీసీసీ వర్కింగ్ ప్రెసిడెంట్ అంజన్ కుమార్ యాదవ్‌తో కలిసి అసెంబ్లీ నుంచి మంగళవారం గాంధీ భవన్ వరకు భారీ ర్యాలీ నిర్వహించారు. పటాకులు కాల్చుతూ నృత్యాలు చేశారు. అనంతరం గాంధీ భవన్‌లో అనిల్ యాదవ్ మాట్లాడుతూ.. చిన్న వయసులో తనకు అధిష్టానం పెద్ద పదవి ఇచ్చిందని.. ఇది తన జీవితంలో గొప్ప సంఘటన అన్నారు.

పార్టీ నేతలకు కృతజ్ఞతలు తెలిపారు. బీసీ బిడ్డను పెద్దల సభకు పంపుతున్నందుకు బీసీలందరికీ గర్వకారణం అన్నారు. కష్టానికి ఫలితం దక్కిందన్నారు. ఇది అనిల్ కుమార్ విజయం కాదు యువజన కాంగ్రెస్ విజయం అని స్పష్టం చేశారు. ఎమ్మెల్యే బీర్ల అయిలయ్య మాట్లాడుతూ.. కాంగ్రెస్ అధిష్టానం యాదవ సామాజిక వర్గానికి గొప్ప అవకాశం కల్పించిందన్నారు. అసెంబ్లీ ఎన్నికలలో గొల్ల కుర్మలు పూర్తిగా కాంగ్రెస్‌కు మద్దతు పలికారన్నారు. రాబోయే పార్లమెంట్ ఎన్నికలలో మరింత మద్దతు ఇచ్చి కాంగ్రెస్ పార్టీ ఘన విజయం సాధించేలా కృషిచేస్తామన్నారు.