కాంగ్రెస్ గెలుపుకు కారణం అదే.. ఈటల రాజేందర్ ఆసక్తికర వ్యాఖ్యలు

దిశ, వెబ్‌డెస్క్: బీజేపీ కీలక నేత, మాజీ ఎమ్మెల్యే ఈటల రాజేందర్ మరోసారి కీలక వ్యాఖ్యలు చేశారు. సోమవారం గజ్వేల్‌లో ఆయన మీడియాతో మాట్లాడుతూ.. మొన్నటి అసెంబ్లీ ఎన్నికల్లో మాజీ సీఎం కేసీఆర్‌పై కోపంతోనే ప్రజలకు కాంగ్రెస్‌కు ఓటేశారని, లోక్ సభ ఎన్నికల్లో మాత్రం బీజేపీకే ఓటేస్తామని ప్రజలు చెబుతున్నారని అన్నారు. దేశంలో మహిళల ఆత్మగౌరవం నిలబెట్టిన ఘనత బీజేపీ ప్రభుత్వానిదేనని అన్నారు. 10 లక్షల మందికి వడ్డీ లేని రుణాలు ఇస్తున్నామని చెప్పారు. పంట పండించే రైతులకు కేంద్ర ప్రభుత్వం అన్ని విధాలుగా అండగా ఉంటోందన్నారు. ఎరువులు, విత్తనాల కొరత లేకుండా చూస్తున్నామని తెలిపారు. గత కాంగ్రెస్ పాలనలో ఎక్కడ చూసిన కుంభకోణాలేనని విమర్శించారు. కాగా, ఇటీవల జరిగిన అసెంబ్లీ ఎన్నికల్లో హుజురాబాద్‌తో పాటు కేసీఆర్ ఇలాకా గజ్వేల్‌లోనూ పోరాటం చేసిన విషయం తెలిసిందే. పోటీ చేసిన రెండు చోట్ల ఈటల ఓడిపోయారు. మళ్లీ పార్లమెంట్ ఎన్నికల్లో పోటీకి ఆయన సిద్ధం అవుతున్నారు. మల్కాజిగిరి పార్లమెంట్ స్థానం నుండి పోటీ చేయాలని ఈటల ఉవ్విళ్లురుతున్నారు.