TSPSC బోర్డు సభ్యులపై అద్దంకి దయాకర్ సీరియస్

దిశ, తెలంగాణ బ్యూరో: టీఎస్​పీఎస్సీ కుళ్లిపోయిందని టీపీసీసీ అధికార ప్రతినిధి అద్దంకి దయాకర్​విమర్శించారు. ఒక్క నోటిఫికేషన్‌ను కూడా సక్రమంగా పూర్తి చేయలేని పరిస్థితుల్లో బోర్డు ఉండటం దారుణమన్నారు. శనివారం ఆయన గాంధీభవన్‌లో మీడియాతో మాట్లాడుతూ.. గ్రూప్-2 వాయిదా వేయడంలో ఇబ్బందులు లేవన్నారు. గ్రూప్-2 వాయిదా వేయాలని 6 లక్షల మంది విద్యార్థులు రోడ్డెక్కారన్నారు. విద్యార్థులంతా పరీక్షలను కేవలం వాయిదా వేయాలని కోరుతున్నారని, కానీ ప్రభుత్వం ఆ దిశగా చర్యలు తీసుకోవడం లేదన్నారు.

సమస్యను పరిష్కరించాలని టీఏస్ పీఎస్సీకి 48 గంటల సమయం ఇచ్చామని, కానీ ఇప్పటి వరకు ఎలాంటి నిర్ణయం తీసుకోకపోవడం దారుణమన్నారు. ఆఫ్​లైన్ ఎగ్జామ్‌లకు ఇబ్బందులు లేకపోయినా.. ప్రభుత్వం నిర్లక్ష్యం వహిస్తుందన్నారు. పరీక్ష వాయిదా వేయకుంటే అఖిలపక్షం ఆధ్వర్యంలో బంద్‌కు పిలుపునిస్తామని హెచ్చరించారు. విద్యార్థులకు అండగా నిలుస్తున్న కాంగ్రెస్ నేతలను అరెస్టులు చేయడం దారుణమన్నారు. ప్రభుత్వం అక్రమ అరెస్టులను ఆపాలని కోరారు.