పవర్‌లోకి వచ్చిన 100 రోజుల్లోనే ఆరు గ్యారెంటీలు అమలు: భట్టి విక్రమార్క

దిశ, డైనమిక్ బ్యూరో: కాంగ్రెస్ హామీ ఇచ్చిన ఆరు గ్యారెంటీలను ప్రభుత్వం ఏర్పడిన వంద రోజుల్లోనే పూర్తిగా అమలు చేస్తామని కాంగ్రెస్ సీనియర్ నేత భట్టి విక్రమార్క హామీ ఇచ్చారు. ఇవాళ ఖమ్మం జిల్లా ముదిగొండ మండలం యడవల్లిలో భట్టి ఎన్నికల ప్రచారాన్ని ప్రారంభించారు. ఈ సందర్భంగా ఆయన మాట్లాడుతూ.. రాష్ట్ర వ్యాప్తంగా 1360 కిలోమీటర్లు పాదయాత్ర చేసి ప్రజల సమస్యలను తెలుసుకుని మ్యానిఫెస్టోలో పొందు పరిచామని భట్టి అన్నారు.

మధిర నియోజకవర్గానికి ఎంతో చరిత్ర ఉందని, మధిర నియోజకవర్గానికి అనేక సంక్షేమ కార్యక్రమాలు తీసుకొచ్చానన్నారు. ప్రభుత్వంతో పోరాడితేనే మధిర నియోజకవర్గానికి దళిత బంధు వచ్చిందన్నారు. బీఆర్ఎస్ ప్రభుత్వంలో గ్రామాల్లో పనులు జరగడం లేదని, మోసం చేయడం, మాటలు చెప్పడం బీఆర్ఎస్‌కు అలవాటు అయిందని మండిపడ్డారు. ప్రజల జీవితాల్లో మార్పు రావాలంటే ప్రజలు ఎన్నికల సమయంలో ఆలోచించాలని, బీఆర్ఎస్‌ పార్టీని బంగాళాఖాతంలో కలపాలని భట్టి పిలుపునిచ్చారు.