శభాష్ రాహుల్ సిప్లిగంజ్.. అభినందించిన బండి సంజయ్

దిశ, డైనమిక్ బ్యూరో : ఆస్కార్‌ బెస్ట్‌ ఒరిజినల్‌ సాంగ్‌ విభాగంలో 'నాటు నాటు' నామినేట్‌ అయిన సంగతి తెలిసిందే. ఈ సందర్భంగా ఆర్ఆర్ఆర్ టీంకు సినీ, రాజకీయ ప్రముఖుల నుంచి శుభాకాంక్షలు వెల్లువెత్తుతున్నాయి. ఆస్కార్ నామినేషన్ దక్కించుకున్న సందర్భంగా నాటునాటు పాట పాడిన సింగర్ రాహుల్ సిప్లిగంజ్‌ను మంగళవారం రాత్రి బీజేపీ స్టేట్ చీఫ్ బండిసంజయ్ కలిసి శుభాకాంక్షలు తెలిపారు. పూలగుచ్ఛం అందజేసి శాలువాతో సన్మానం చేశారు. అనంతరం రాహుల్‌కు అభినందనలు తెలిపి స్వీట్ తినిపించారు. ఆ తర్వాత కాసేపు ముచ్చటించారు.

ఈ క్రమంలో బండి సంజయ్ విజ్ఞప్తి మేరకు రాహుల్ నాటు నాటు పాట పాడారు. దీనికి సంబంధించిన ఫొటోలు, వీడియోలను బండి సంజయ్ ట్విట్టర్‌లో షేర్ చేశారు. 'తన టాలెంట్‌తో ఆర్ఆర్ఆర్ సినిమాలో నాటునాటు పాట పాడి ఆస్కార్ బరిలో నిలిచిన రాహుల్ సిప్లిగంజ్‌ను కలిశాను. ఈ అద్భుత సమయాన్ని రాహుల్‌తో కలిసి సెలబ్రేట్ చేసుకున్నాను. మన హైదరాబాద్ కుర్రాడు పాడిన పాట వరల్డ్ ఫేమస్ అవ్వడం చాలా సంతోషంగా ఉంది. ఆర్ఆర్ఆర్ మూవీ టీమ్‌కు నా అభినందనలు. ఇంకా మరెన్నో అంతర్జాతీయ అవార్డులు గెలవాలని కోరుకుంటున్నాను'అని బండి సంజయ్ ట్వీట్ చేశారు. కాగా, బండి సంజయ్‌ ప్రజా సంగ్రామ యాత్ర కోసం రాహుల్ సిప్లిగంజ్ ప్రత్యేక సాంగ్‌ పాడిన సంగతి తెలిసిందే.