ఆన్​లైన్​లో టెన్త్​ ఫలితాలు

దిశ, న్యూస్​బ్యూరో: కరోనా వైరస్ వ్యాప్తి నేపథ్యంలో టెన్త్ పరీక్షలను రద్దు చేసి, విద్యార్థులందరినీ పాస్ చేసిన ప్రభుత్వం అసెస్‌మెంట్ మార్కుల ఆధారంగా గ్రేడ్‌లను కేటాయించింది. పదో తరగతిలో నమోదు చేసుకున్న 5,34,903 మంది విద్యార్థులను ఉత్తీర్ణులను చేసినట్లు విద్యాశాఖ మంత్రి సబితా ఇంద్రారెడ్డి తెలిపారు. ఇంటర్నల్ అసెస్ మెంట్ మార్కులకు 20శాతం వెయిటేజీ ఉండగా, వాటినే వందశాతానికి పెంచారు. విద్యార్థులు 20కి తెచ్చుకున్న మార్కులను 5తో హెచ్చించడం ద్వారా ఆయా సబ్జెక్టుల్లో మార్కులను కేటాయించి ప్రక్రియ పూర్తి చేశారు. విద్యార్థులు గ్రేడ్లను చూసుకునేందుకు www.bse.telangana.gov.inలో సోమవారం మధ్యాహ్నం నుంచి ఆన్‌లైన్‌లో అందుబాటులో ఉంచారు. పాస్​ మెమోలను సంబంధిత పాఠశాలల నుంచి తీసుకోవాల్సి ఉంటుంది. మెమోల్లో పొరపాట్లు ఉన్నట్టు విద్యార్థులు గుర్తిస్తే ప్రధానోపాధ్యాయుల ద్వారా ఎస్​ఎస్​సీ బోర్డును సంప్రదించి సరిచేయించుకోవాలని మంత్రి సూచించారు.